鄭嘉穎 陳凱琳拍拖搵銀冧笑

鄭嘉穎昨日與女友陳凱琳（Grace）到寶琳MCP新都城中心，出席「《新春百鳥桃花園》揭幕禮」，是兩人拍拖以來首次以情侶檔出騷，嘉穎以一套Shocking Pink型仔西裝襯煲呔亮相，Grace則低胸毛毛白裙示人，一對小情人由出場起已不時對望甜笑，司儀慫恿兩人甜蜜錫錫，被嘉穎以「咁我哋返入後台預備吓先」打發，之後兩人在台上玩遊戲，並應大會要求餵食新年糖果，又手綁紅線玩十指緊扣，之後Grace再親手為嘉穎圍上長頸巾，煙韌放閃。

留到結婚先錫

兩人受訪時，嘉穎被問到為何不錫錫時，竟緊張得說話走音，他說：「都唔係嗰啲！Sweet都要睇場合，結婚錫就好應該。（情人節再情侶檔？）偶然一次幾得意，唔使咁密。（情侶檔酬勞80萬？）咁等我去追番啲尾數先！唔使講到咁誇張，酬勞滿意，比平時高啲啲咁啦！（當你哋新人咁玩？）又唔算！」

陳凱琳餵鄭嘉穎食糖時，四目交投。	鄭嘉穎和陳凱琳首次以情侶檔出席活動搵銀。	這對煙韌情侶與現場觀眾玩遊戲。

Grace附和男友說：「玩新人應該好慘，但我哋好開心！（同意嘉穎唔公開錫錫嘅理由？）咁呢度係商場，今日已經好Sweet啦！」問到兩人新春會否互相到對方家向長輩拜年，嘉穎說：「會！（正式見家長？）其實見過啦，Auntie同Uncle都好Nice。（你媽咪點對Grace？）不得了！會問佢鍾意飲乜湯，唔再問我！（幾時派雙封利是？）一步步嚟，一單還一單，唔好溝到亂晒。（去旅行慶祝拍拖一周年？）關你咩事？唔會講你知！」Grace補充說：「嘉穎媽媽好Friendly，好好傾，相處好舒服！」

短訊慰問舊愛

對於舊愛王馨平（Linda）父親王羽急性腦出血一度命危，嘉穎說：「我尋晚知呢件事，我諗Linda依家都好忙，我send咗message，因為早排我有啲事搵佢幫手，諗番都唔好意思，可能煩到佢。（Linda覆你乜嘢？）都係講吓situation ，但唔應該由我講出嚟畀大家知。（對上一次見王羽係幾時？）好耐好耐喇！」

文：影視組