蔣家旻 陳庭欣 互相偷師求突破
蔣家旻個「家」、陳庭欣個「庭」，拼在一起就是「家庭」，剛好兩人都有出演過以「家庭」為主線的《愛．回家》！雖拍攝同一套劇，但兩人線路不同甚少碰面，主力做主持的Toby又與主力拍劇的Angel合作機會少之又少，但兩人間其實甚有淵源，除了同為無綫「大家庭」的藝員外，亦在同一個經理人「媽媽」下的「小家庭」共存！二人雖然在不同範疇各有所長，但會互相欣賞對方的優點，希望事業更進一步！
蔣：蔣家旻（Angel）
陳：陳庭欣（Toby）
易相處至啱傾
Toby與Angel看似沒有特別關係，但其實二人都屬同一經理人，亦有份參與劇集《愛．回家》。後期加入《愛．回家》的Toby更笑言「細細個」已睇Angel拍劇，認為對方是傻大姐，如「馬子妮」一樣。而Angel亦表示羨慕Toby的港姐身份。
蔣：我哋兩個係同一個經理人嘅，亦都拍《愛．回家》。
陳：但拍劇冇見過，因為當時就畀「查查」（黃子雄）私有化咗，淨係做佢女朋友！我同Angel私底下有個好大嘅group，係經理人開嘅，逢親有咩活動要召集大家，好似台慶、食盆菜呢啲就會溝通。平時真係較少聯絡，因為之前我係屬於綜藝組，拍劇機會較少，但係一有大型活動見到面就會好多嘢講。
蔣：識Toby因為知佢係港姐，之前亦有開餐廳。覺得參選港姐係需要好有自信，所以每次見到港姐都覺得佢哋好勁，唔驚對住觀眾着泳衣，又咁有儀態，擺甫士到談吐都受過training。
陳：我細細個就睇Angel啦！因為我入行遲過佢，之前自己作為觀眾睇電視，覺得同啲藝員距離好遠，點知現實中佢係傻大姐一個，幾似佢喺《愛．回家》入面「馬子妮」個角色，演得好自然，同埋佢成日都好開心，好似之前一齊為台慶排舞，好攰好長時間，但成日聽到佢嘅笑聲！
蔣：Toby個人都好易相處，本身覺得參選港姐嘅都比較文靜，或者好難溝通，但接觸咗先知佢係咁talkative，仲好主動同你傾偈！
齊為台慶出力
二人憶述首次合作是於2010年台慶，雖然私下很少相處，但一見面就有種親切感，更找到不少共同話題！而在早前的台慶，二人再次合作，一齊表演跳舞，Angel大讚Toby夠fit之餘更學得快，表示自己要向對方多加學習。
陳：我哋喺2010年嘅台慶第一次合作！因為Angel拍劇多，可能喺啲慈善節目見過。不過本身我哋兩個係同一個經理人，雖然私底下冇乜一齊相處，但一見到就覺得有種無形嘅親切感，即刻搵到話題。
蔣：多數都係傾扮靚，嗰陣排舞望到佢睇電話就問佢睇乜，佢即刻介紹畀我！Toby本身已經好瘦，仲愈keep愈fit，我自己有時一唔keep就會彈番轉頭，我見佢好勤力，一齊排舞嗰時冇嘢做我就坐喺度休息，但佢係無時無刻都train緊。
陳：因為好凍一定要搵啲嘢做！同埋王君馨本身好鍾意跳舞，成日拉埋我哋一齊拉筋。
蔣：自己以前學芭蕾、Jazz，但今次跳Ballywood真係第一次接觸，啲手腳好唔協調！
陳：反而Ballywood啲動作硬啲，唔需要咁柔軟，我本身跳舞麻麻，所以今次就啱我，我會當佢係一個動作咁做，食啱個beat夠準就ok！
蔣：嗰套露腰衫對Toby嚟講完全冇問題，我真係要學佢努力咁keep！而Toby企正喺我前面，我有時都會停咗喺度諗下個step係乜，但佢學得好快，好似冇錯過。
陳：我就太專心自己做緊乜，完全冇理過身邊嘅人，哈哈！
學習對方優點
Toby與Angel雖然在《愛．回家》第1輯中沒有對手戲，不過Angel都十分欣賞Toby在劇中輕鬆的演出，而Toby亦表示拍攝的過程好開心。至於問到二人最羨慕對方的地方？Angel表示最欣賞對方的身材及談吐得體。Angel的演出經驗豐富，Toby希望可以如對方般演出自然。
蔣：自己有時拍緊都未必可以每集追嚟睇，但我好鍾意Toby喺入面同「查查」條線，我覺得好正，兩個人都好似英文係母語咁，我覺得佢哋好有情侶嘅感覺，啲英文好好聽！
陳：我拍《愛．回家》冇佢哋咁長時間，由客串到逐漸多咗戲份，未拍前特別鍾意佢哋「馬家」，真係令人有「回家」的感覺。而我同「查查」就負責搞笑，同埋「查查」有時啲表情好誇張，我初初成日忍唔住笑，但係拍處境劇比較輕鬆，所以拍得好開心！
蔣：我最羨慕Toby嘅身材，之前排舞成日見，有時放飯大家跳到好熱，見佢着住件背心仔，應有嘅有，應瘦就瘦！同埋佢主持好叻，有時見佢出活動又唱歌又做主持，真係好口齒伶俐，而且又係女強人，之前自己開餐廳，我都好想開番間，但未得住！
陳：Angel拍攝經驗比我多好多，我就司儀方面多啲，自己知由司儀轉過去做演員嗰種艱難，成日有啲司儀腔好難改，所以好羨慕佢哋可以handle到個角色咁舒服，令人覺得個角色就係自己，到依家我都覺得佢係「馬子妮」，而且Angel又有拍電影，希望佢兩邊都可以發展得好好！
文：陳丹
攝：黎志輝
場地：decor collection帝家設計@銅鑼灣
陳庭欣化妝：Phoebe Yung
髮型：HAiR - Match
蔣家旻服裝：Amelie Street
髮型：Leo Yiu@Osmosis Salon