周潤發蒙面俠零下17℃闖京

周潤發（發哥）與太太陳薈蓮（發嫂）約昨晚七時現身北京機場，準備為主演的賀歲猛片《賭城風雲III》展開為期一星期的內地宣傳之旅，稍後又隨大隊前往成都、廣州等地宣傳。當地氣溫只得零下17度，極度寒冷，發哥亦做足準備，抵達時，除出動Cap帽、口罩和手套，更將羽絨帽笠實個頭，只露出雙眼，不過身形高大的發哥仍十分顯眼。夫婦倆甫見記者，即友善地揮手打招呼。

拉低口罩受訪

過去兩年，《賭》片頭兩集均贏盡票房和口碑，去年《賭城風雲II》票房更高達9.74億人民幣（約12.34億港元），成為內地春節票房總冠軍。今年乘勢再接再厲，除了有發哥、張家輝、劉嘉玲坐鎮外，今集更有另一好戲之人張學友加盟，陣容強大，《賭III》片自然獲外界睇好，身為賀歲票房福將的發哥，心情當然特別靚。

周潤發夫婦向記者揮手道別。	周潤發與太太陳薈蓮現身北京機場時，將羽絨帽笠實頭部，可想而知天氣多寒冷！	發嫂陪周潤發到內地宣傳新片。

雖然由頭笠到落腳趾尾，但親切的發哥也應記者要求，拉低口罩接受本報訪問。問有否信心《賭III》破去年紀錄？他說：「未知o架，要睇吓有乜對手。」當記者表示今年賀歲檔遇上強敵，包括周星馳執導電影《美人魚》和郭富城主演電影《西遊記之孫悟空三打白骨精》，發哥即哈哈大笑說：「直頭由香港打到上嚟喎！」

即席教運動抗寒

提到北京只得零下十幾度，發哥笑稱：「唔出去咁多囉！盡量留喺入面，只係上落車啫！」有甚麼保暖方法？他即發揮搞笑本領說：「着少啲囉！（食啲暖嘢？）唔使，着少啲得o架喇，當你同出面氣溫一樣嘅時候，就唔覺凍o架喇。」相當幽默。講到香港氣溫也只得個位數，他說：「係呀，香港仲凍，北京乾，香港濕吖嘛。（有咩方法教大家？）運動吓！」語畢，經常行山、做運動的發哥，又調皮地原地跑了幾步。登上座駕前，發哥和發嫂又向記者揮手道別，認真窩心。

文：影視組