張家瑩胸大自卑失落青春期
【陳嘉敏菲律賓直擊】前亞姐冠軍張家瑩（Grace）早前到菲律賓旅行，並以比堅尼上陣大騷身材，張家瑩擁有34D胸器及40吋長腿的完美身材，被冠以女神稱號！不過她自爆曾於青春期時，因豐滿身材而感到自卑，更成為同學笑柄。
獲雙親遺傳高挑身形的張家瑩，自小已生得高頭大馬，原本是游泳港隊的她停止游水後上圍更開始發育，她說：「我細個係游水嘅青年港隊，當年要不停訓練同着好窄嘅泳衣，直至14歲，家人要我停止游水專心考試，上圍就變得豐滿。比起其他同學，我算發育得早，會因為身材而畀人笑同成為話柄，覺得自己同其他人唔一樣，所以好自卑，加上我係運動健將，鍾意戶外運動，上圍太勁令我覺得唔方便，所以青春期對我嚟講係有啲唔開心。」
參選亞姐重拾自信
後來張家瑩到英國讀書，由於外國女生的身形比較高大及豐滿，才令她走出自卑，相比外國女生，張家瑩只覺身材平平無奇，直至張家瑩返港參選亞姐才讓她對自己的身形感到自信。為令身材臻至完美，張家瑩近幾年積極減肥，刻意節食及勤做瑜伽，令身形更弗，並希望可以keep多十年。
想行性感時尚路線
張家瑩經常拍旅遊及飲食節目，在節目上頻頻以泳裝示人，她開玩笑指怕被人誤以為露體狂，以後會選擇性以泳衣上鏡，她坦言：「其實我有諗過性感底線，我一直堅持以健康性感為原則，外國好多女星、名模都會行性感路線，好似高級時裝嘅模特兒，佢哋唔止係性感，仲係好靚同時尚，我最欣賞Miranda Kerr同Kate Moss，我都希望可以走呢條路線。（會唔會考慮影全裸但三點不露嘅相？）暫時唔諗，除非我嘅身形好到不得了，我就會好自信咁影。（寫真呢？）一直都好想出，但遇唔啱機會，如果搵啱一個好好嘅攝影師同班底都會想。」