劉佩玥獨立女強人唔恨嫁豪門

願愛得及時

身邊不乏緋聞男友的劉佩玥遲遲未修成正果，只因樂做女強人，工作行先，愛情殿後。專注搏殺事業的她卻不忘兼顧家庭，為愛得及時，索性黐家做宅女。

「每個人嘅目標都唔同，嫁入豪門就唔係我自己嘅目標，自己鍾意靠自己努力，靠自己係最開心嘅，特別係當父母知道你咁叻女，咁先係最開心。報章畀咗幾個緋聞男友我，好似黃又南、何猷亨、伍允龍，呢啲緋聞都係假嘅，其實依家自己好專心做演員呢份工作，所以唔心急拍拖，拍拖好睇timing同感覺。依家嘅自己事業心好強、衝得好緊要，已經年幾冇放假，好努力、亦好enjoy工作，希望達到自己目標先諗其他嘢。如果拍拖一定會好公開同大家講，依家唔係落閘唔拍拖，只係道門仲未打開，因為太多嘢要兼顧，所講嘅目標係希望每個角色都做得好，依家最想係做一個好演員，其他嘢唔諗咁多。

劉佩玥憑《四個女仔三個BAR》一劇彈起，穩步向好演員目標進發。	劉佩玥與岑麗香因合作拍劇建立友誼。	劉佩玥呻好姊妹陳瀅被何猷亨（圓圖）「撬」走。

重姊妹情多於愛情

「外在條件只係過眼雲煙，靚可以變醜，內心靚先係最重要，自己將來搵男朋友，第一係要對方孝順，第二係有上進心，自己好着緊屋企人，接受唔到另一半唔錫屋企人。媽咪呢排見到我返完工就返屋企，返完屋企就返工都有啲驚，媽咪叫我不如你去吓街啦。媽咪以前唔會咁，只係會催我快啲返屋企，依家就反而奇怪我咁黐家，點解成日喺屋企嘅？驚我唔開心、壓力大。我同媽咪講想專心工作，同埋想抽多啲時間想陪吓佢哋，唔想似古巨基首歌咁，突然先見到你哋有皺紋、突然見到你哋有白頭髮，唔想自己後悔愛得太遲，依家成日同佢哋講我愛你。

何猷亨	劉佩玥獻螢幕初吻給拍檔馮允謙，大爆事前好緊張。	劉佩玥盛讚陳煒好戲，在片場經常眼甘甘(目及)實對方。

「陳瀅係好姊妹，何猷亨係好朋友，我同陳瀅係以老婆相稱，其實係猷亨撬咗我老婆先啱！哈哈！大家都係好朋友，陳瀅亦都冇重色輕友，我哋都成日見面。同猷亨真係朋友，到依家大家關係都好好。

「其實由細到大都冇試過同好姊妹鍾意同一個男仔，所以唔使爭風呷醋。讀書時試過有個男仔鍾意我同個姊妹，但畀我哋知道之後就一齊唔睬佢，姊妹情就係咁，最緊要係乜都講、坦白，冇乜嘢可以阻擋到女仔power，自己亦係重友情多過愛情嘅女仔，中學已經咁重友情，大個咗就更加珍惜友情。」

拒急功近利

劉佩玥懷着感恩的心情當演員三年，從不急功近利，安於自己的步伐建立根基。她每次開工都把握機會向前輩學習，尤其欣賞陳煒，難忘在片場被對方的演技震懾。

「入行三年好感恩，自己覺得每個行業嘅根基都要打得好，先可以喺上面起高樓大廈，如果唔係好易冧，覺得自己步伐好舒服、好穩健、好滿足，希望將來發展會更好。之前出街嘅劇集《實習天使》裏面做口直心快，男仔頭嘅學護，角色有一半似自己，如果混合埋劇集《四個女仔三個BAR》嘅角色就有八九成似我，拍呢套青春劇諗番起讀書時間，無憂無慮。開工同岑麗香、洪永城合作得好開心，佢哋拍戲經驗比我多，同佢哋傾戲，可以由另一個角度去睇，喺佢哋身上真係學到嘢。特別同香香開工好開心，入行前已經好鍾意佢，覺得佢好得意，認識之後覺得佢更加sweet，係我一個好好嘅傾訴對象，有時好攰會同佢傾訴、又會講吓女仔八卦嘢。

咀馮允謙心肝卜卜跳

「講到《實習天使》最難忘，大家一定估唔到係同陳煒合作，佢喺亞視嗰陣我已經好欣賞佢，覺得佢好有氣質，對眼好sharp，佢之前拍嘅《梟雄》、《東坡家事》我都有睇，佢做戲愈嚟愈有戲味。開工嗰陣我忍唔住成日眼甘甘咁望實佢，留意到陳煒嘅專業態度好值得學習，無論幾攰佢開工都係表現得好精神。最深刻係佢拍《實習天使》有場戲，冇音樂、氣氛襯托下，陳煒靜靜地流出一滴眼淚，已經勝過千言萬語，令人好感動，好有味道。自己係新人，要拍喊戲都有啲難度，自己本身又開心，所以要時間培養感情，等自己去投入角色。今次仲獻出咗我嘅螢幕初吻畀馮允謙，拍之前好緊張，但到埋位又冇想像中咁尷尬，可能大家溝通得好好，但係錫完個心仲係咁卜卜跳，冇諗過大家咁成熟去完成呢場戲，亦令我明白到做演員溝通好重要，同埋最緊要唔好怯。」

女神搞爛Gag

性格樂天開朗的劉佩玥接受訪問除了答問題爽快直接，更愛搞爛Gag，好似問到想不想嫁入豪門？她則笑謂是否嫁個姓豪叫阿門的老公；講到現今年輕人買樓問題，她又稱衫鈕就買到，Gag的確夠爛才好笑。

採訪：影視組

攝影：張福宏

服裝：bread n butter