Lam個唱搞「戲」氛預告爆家事
殿堂級歌手林子祥（阿Lam）將於下周四起假紅館舉行一連四場《林子祥佐治地球40年演唱會》，昨日他為個唱綵排，即席唱出《最愛是誰》等金曲。期間，老婆葉蒨文（沙麗）到場探班，看到現場有可愛小狗，兩人即忍不住逗玩。阿Lam受訪時指前日開始正式綵排，過程一直順利，還預告屆時獻唱接近50首歌：「當中有一、兩首串燒歌，但就唔係《十分十二吋》咁長。（呼籲觀眾準時到場？）至好！我就梗喺度。（驚唱到超時？）應該唔會過11點半，每隻歌兩分幾鐘都完。」
午睡抖足開騷
阿Lam又透露今次個唱將有畫面襯托，故感覺不像演唱會，反而像他在台上帶動一齣戲，並打算反傳統講得多說話：「因為有畫面，所以要講嘢帶入畫面同隻歌，咁先可以令觀眾跟住個過程。（講感人說話？）今次開40周年演唱會，唔係話自己做過咩、攞過咩，最緊要講我成個人啲過程，好似講私人啲(o架)嘢，又會講屋企、爹哋媽咪、仔女同沙麗。」他表示屆時跟沙麗及兒子林德信同台唱歌，而年近80歲的外籍老師亦會捧場。
講到習慣早睡早起，開騷豈不是要夜瞓？現年68歲的阿Lam自嘲是老人家：「臨到做騷先會夜瞓，但就算我好(支力)都只係會瞓四、五個鐘，情願中午瞌一瞌先至開騷。」
文：音樂組