吳業坤為女人 棄做「機」佬
樂壇新人王吳業坤早前與「坤姐」龔嘉欣的緋聞鬧得熱烘烘，近日有傳龔嘉欣與張振朗才是一pair，他是否被張振朗撬牆腳？坤坤說：「佢哋唔會呃我！」自認熱愛打機的他，表示以前拍拖試過因打機與女友嗌交，不過以大局為重當然是「棄機揀人」啦。
藝人吳業坤昨日到觀塘apm出席遊戲機品牌活動，即場示範大玩將推出的最新遊戲，打得有板有眼。問到近日有傳龔嘉欣與張振朗在拍攝劇集《愛‧回家》戲假情真，兩人才是一對，坤坤笑言：「絕對唔係，大家好熟悉大家，都知道唔係拍拖，覺得佢哋唔會呃我。（張振朗撬你牆腳？）呢個係另一個範疇，龔嘉欣唔會撬我牆腳。好得意，變咗三角戀，但只會拍劇發生，現實生活就唔好喇。」
打機有心癮
此外，熱愛打機的坤坤表示雖然最近工作較忙，仍有心癮心思思想打機：「因為我買咗部遊戲機放咗喺床頭，瞓覺會唔小心見到佢，所以都會犧牲兩個鐘睡眠時間打機。」他表示非常佩服在網上邊直播邊打機的網民，能夠一心二用，自嘲在台上打機時都不知道自己在說甚麼！
曾忽略女友
問坤坤打機時可會露出真性情爆粗？他笑言：「同好熟嘅朋友就會，唔會呃你哋唔講粗口嘅。（有女仔在場呢？）會斯文啲，偽毒吖嘛！」又指適當的叫喊能夠紓壓，但絕不可以辱罵人。問他可曾試過拍拖只顧打機忽略了女友？坤坤說：「好多年前試過。（嗌交？）女性有好多理由會嗌交，呢個係其中一個原因。（打機同女友，兩樣揀邊樣？）以大局為重，梗係揀人啦！」
文：音樂組