高海寧地下情穿煲風騷笑哈哈
無綫咪神高海寧（高Ling）被最新一期《好報》踢爆與林峯御用監製鄧智偉秘戀三年，二人更在馬鞍山天宇海築愛巢達一年，但為保愛苗，一於約法三章，實行鬼祟同居。紙包不住熊熊戀火，前日還扮返旺角娘家的高Ling，昨日高調從天宇海愛巢出車往金鐘，全程甜到漏表現風騷，她還事先張揚今天見傳媒交代戀事，並以「哈哈」回覆記者短訊。
擁34D無敵身材的高海寧鮮有緋聞，但原來伊人一直密冚戀情。昨日《好報》踢爆29歲的高Ling與林峯御用監製、現年40歲的鄧智偉秘戀三年，鄧智偉錫到高Ling燶，有傳還出了信用卡讓女友任碌。但為保愛苗及以免影響女友事業，即使二人在一年前於馬鞍山天宇海築愛巢共賦同居，也要約法三章，絕不同步返歸之餘，返抵愛巢亦要易容喬裝才上樓，發現記者的高Ling更要扮返旺角娘家「安全屋」，還要人前人後扮唔識，把「高鄧戀」埋藏地底最深處。
避嫌返「安全屋」
前日「高鄧戀」未爆出，高Ling出席完活動後獨自往九龍站上蓋商場食日本菜，未幾好友陳智燊（Jason）和宋熙年「伉儷」會合高Ling一齊開餐，食到晚上九點，宋熙年右翹高Ling，左翹未婚夫Jason步出，待Jason離開後，兩女孖公仔Shopping，約一小時後才各自返歸。高Ling到停車場時發現記者，蜜運中的她心情大靚，還向記者舉V，顯得極之風騷。
一如以往有記者追訪，高Ling自動波揸車返回旺角「安全屋」避風頭，不過昨日被踢爆與鄧智偉秘戀後，高Ling即放下包袱不再避嫌，高調現身天宇海愛巢，昨日下午2時30分，高Ling從天宇海揸車前往金鐘，下車時企定定讓記者任影，全程笑晒。她對於與鄧智偉秘戀三年、是否早已同居、密冚戀情是否怕影響事業、信用卡是否任碌等問題均沒有回答，雖說自己趕時間，但她卻風騷預告留待今天活動交代戀事，擺明暗示把「高鄧戀」公布天下。
戴罩掩人耳目
本報致電高Ling時，她也暫時封口，開心以短訊回覆：「哈哈！咁多謝你哋咁盡力幫手宣傳《愛情食物鏈》啦！」至於男友鄧智偉亦與女友口徑一致，在短訊回覆謂：「多謝關心，私人事唔回應啦，謝謝！」
其實高Ling於去年10月已被拍得出入天宇海愛巢，當時為免被街坊認出，臨上樓前她一定笠晒口罩、架上眼鏡，以及長髮披面掩人耳目。至本月13日高Ling牛一，鄧智偉返回天宇海跟女友慶生都要笠兩頂帽以策安全，如今「高鄧戀」被爆，相信日後返屋企都唔使咁辛苦！
文：專案組
攝：追蹤組