鄭少秋一屋女人冇得做主

鄭少秋（秋官）昨日與麥玲玲齊齊以嘉賓身份出席於跑馬地馬場舉行的「農曆新年賽馬日」記者會，兩人將於猴年大年初三到沙田馬場與大家一同歡度農曆新年，秋官到時還會即場獻唱賀年歌曲。當日另一嘉賓郭富城則拍了片預告到時會大派利是及送出賀歲片《西遊記三打白骨精》的戲票，與市民同賀新歲。為慶祝猴年的到來，馬會將於新春期間連環發放合共逾8千萬元的彩金，就連秋官亦覺得非常吸引，他說：「嗰日有5,800萬，我會小賭怡情，刀仔鋸大樹。（你有冇賭運？）我賭運OK啦，不過不失，嗰日係最大日子，唔落場玩吓點知自己運氣好。」果然係「唔賭唔知運氣好」！

策騎最緊要定

而演大俠形象深入民心的秋官外形依然相當瀟灑，他表示年前為了要拍有騎馬戲份的電影而特地再度學習騎馬：「由基本功重新學起，一步一步嚟。（學咗幾耐？）得閒就去吓咁啦。我愛馬，人哋話馬就好似女人咁有脾氣，要氹嘅，騎馬最緊要唔好亂同煩躁，要夠定。（你話氹馬就好似氹女人，咁你咪好叻？）睇我啲戲就知我叻。（你氹女人叻呀！）我不嬲都係畀女人馴服，屋企老婆做主，仲有女同工人，成屋都係女人，返到屋企邊有男人嘅地位。（唔係你話事咩？）應該就係嘅，一家之主，但係連煮飯都冇得煮。（咁你咪咩都唔使做？）會聽話會乖，做唔到咪煩囉，好似孫悟空遇到音波功咁，頂唔順，免吵免煩啦！」

秋官直言想與欣宜一齊演出。（資料圖片）	麥玲玲預祝大家節節勝利。	郭富城新年將到沙田馬場大派利是。

想同欣宜演出

另外提到顧嘉煇開慈善騷想找秋官與女兒鄭欣宜合作演出一事，秋官說：「好多都有搵過我哋，不過欣宜嘅唱片公司同經理人配合唔到，安排唔到，所以就唔成事。（你想唔想同欣宜一齊演出？）梗係想，父女檔，之前喺TVB合唱過一次，喺內地都試過。（父女檔酬勞要唔要加碼？）唔計較呢啲，但多啲就仲好。」

文：名人組