星爺唱：世間始終你好 Karen甜爆攞尾彩
周星馳、鄭少秋和莫文蔚（Karen）日前為電影《美人魚》錄插曲，翻唱經典歌《世間始終你好》，歌曲由秋官和Karen合唱，期間星爺歌癮大發錄埋一份，在旁邊吶喊「呼！哈！」更與秋官載歌載舞，三人玩得十分起勁。
錄完音後星爺問二人他表現如何，秋官以「冇得彈」回應，令星爺沾沾自喜說句「多謝」，Karen就Sweet爆說：「其實你揀呢隻歌係咪有說話要同我講呢？」曾與Karen傳緋聞的星爺聞言即說：「係啦係啦，我都終於明白到呢個大道理！」Karen趁勢再攞尾彩：「你知喇咩？雖然遲就遲咗啲。」秋官則預祝票房大賣：「部戲加埋首歌，冇得頂喇啩，點都有30億啦！」星爺即瞪大眼謂：「30億？你講緊咩貨幣先？」兩人不約而同搶答：「美金！」非常搞笑。
有指《美人魚》與內地五大發行商中影、龍騰、聯瑞、和和、光線簽訂20億票房保底協議，即製作商可提前獲得票房收益，而最終票房超出該數額後，發行商可優先獲利之協議，惟內地傳媒向有關公司求證時，他們不約而同表示目前不便透露。