Shirley報警聲稱被性侵

FFx被網民封為「騎呢組合」，隊中就讀教育學院課程的楊澤怡早前聲淚俱下指3年前生活逼人：「又要賺錢租屋，又要畀學費」，之後做了私影女模賺錢，但在一次私影中，遭一名自稱「攝影師」的男子涉嫌侵犯。

上月再邀拍私照

事件曝光個多月後，Shirley昨在經理人陪同下到西區警署報案及落口供，她休息期間步出警署拍照及受訪，並提到涉嫌事發經過：「當時我着比堅尼影相，點知佢唔畀錢我，又唔畀我走。（有冇拒絕？）有。（之後侵犯你？）佢有性侵我！」受訪期間她用手按太陽穴似頭暈，又顯得欲哭無淚，狀甚慘情。

有傳Shirley月前在電台的活動遇上疑似涉案者，Shirley承認說：「經理人話有佢（疑涉嫌者）同場，經理人隔開咗我哋，我冇見到佢。（見面會尷尬？）會，好驚佢。」她更稱疑涉嫌者上月再邀她拍私照：「佢微信再請我上屋企影相，我一口拒絕佢。」又稱對方得知她在新城頒獎禮活動記招得獎後，又傳微信恭喜她，但她堅拒回覆對方。問有傳對方擁有其裸照，可會叫對方交出所有裸照？Shirley說：「唔敢搵佢，交警方處理，會配合警方。（會唔會覺得自己好蠢？）會呀。」

FFx上月在新城活動中獲獎。（資料圖片）

Shirley於昨晚近十時離開警署。

「我要鼓起勇氣」

Shirley被問會否擔心被誤會做援交女？她說不擔心，因清者自清：「我係受害者，唔係自願，我都要鼓起勇氣。（驚唔驚難搵男友？）唔諗呢啲。」又感恩獲同學支持及關心。

另外，有傳疑涉嫌者仍活躍娛樂圈，做幕後工作，記者昨致電該男子，他承認認識Shirley，問到傳涉及風化案，他否認說：「我冇做過，警方冇搵過我，如果警方有需要，我會全力協助調查。」他自稱是攝影師，曾幫Shirley影過相：「冇影裸照同冇侵犯佢，係咪搞錯？」並透露半年前曾與Shirley食飯：「之後有用微信同佢傾偈。」

採訪：音樂組