林峯谷紅館騷操肌上癮
歌手林峯的《瑞士依波路表160週年呈獻 HEART ATTACK林峯演唱會》將在4月29日至5月1日在紅館舉行。是次已是林峯第五度登紅館開騷，為隆重其事，英皇豪花逾7位數做宣傳，更花約60萬買下紅隧九龍入口最大最貴的廣告位。日前林峯與工作人員坐開篷巴士，由尖沙咀出發駛經紅隧，務求與廣告牌來個「世紀合照」。
粒粒皆辛苦
受訪時林峯自爆早在活動前已特地看過廣告牌：「前兩日知掛咗，所以專登揸車經過，效果幾好！對上一次個唱已係三年幾，希望今次畀到新刺激fans，跳舞方面會有增無減！」現時努力健身的他，直言練到上癮：「一開始頭一個月係辛苦啲，但依家慢慢開始上癮，每日一起身都會空肚跑步。」問到現時有多少舊腹肌？林峯笑言：「腹肌不嬲都喺度，依家連水都要少飲，每舊腹肌都練得好辛苦，『粒粒皆辛苦』！」
他透露現時要忍口食得清淡：「要少啲出街食飯或者坐喺度睇大家食。（同女友吳千語食飯都係？）冇所謂，通常都喺屋企烚嘢同蒸嘢。」問到可會挑戰杜德偉在個唱中脫衣騷肌？他笑言：「佢有首歌叫《脫掉》啫，我又冇首歌叫《除褲》。不過我都好大汗同好怕熱，到時除一件半件都唔出奇，總之會配合音樂，到時大家着得涼爽啲，一齊跳！」而個唱門票將於今日起一連五日接受信用卡優先訂票。
文：音樂組
攝：秦健輝