先後戀李小龍柯俊雄 苗可秀認任性：阻止唔到
苗可秀接受電台訪問坦認曾戀有婦之夫的李小龍及台灣影帝柯俊雄，多次跟有婦之夫傳出緋聞的她承認「任性」：「我覺得係命運安排，我冇刻意搵呢啲人，但呢個係雙方嘅。（你沒阻止自己？）有，但我阻止唔到（自己），要發生就會發生。當然，有部分責任喺我身上，但當時嘅情形，大家開心嘅時間確實出現咗，阻止唔到。（是不能自拔？）應該係！」她同時強調沒打算要對方離開太太，單純覺得大家很快樂，而現在回望，這個亦可能是多年來一直未婚的原因。
苗可秀提到與李小龍合作過三部電影，她憶述當年常被李小龍捉弄，又話傳緋聞大概是源於《精武門》的一幕吻戲：「係真Kiss嚟，你哋喺戲度都睇到。（第一次拍吻戲？）係，嗰時大家都好緊張，我哋仲做足準備，不時噴口氣清新劑，兩Take就搞掂。」
感情事無怨無恨
講到73年李小龍突然在女星丁珮家中猝死，苗可秀直言一度不能接受，亦因此哭得很厲害，但她同時講到因為「李小龍效應」，令她今時今日到日本依然有人叫她「女神」。
談到去年底病逝的台灣影帝柯俊雄曾經講過：「一生最虧欠的女人，就是苗可秀。」苗可秀也聽過別人轉述，她說：「感情冇話邊個欠邊個，依家都追唔番，如果我早啲知我會問佢欠我啲咩？我認為任何一段感情，分開只需要記得大家曾經開心過嘅日子，雙方就會無怨無恨，真係冇邊個欠邊個。」