城城叫「朋友」睇戲 拒再包場
郭富城現身電影宣傳活動，在新片以特效化妝變身孫悟空的他，自言是入行以來最辛苦的工作，談到會否再包場請「朋友」睇戲，他笑言今次「希望啲朋友自己包啦！」而同場的羅仲謙則大方談及女友楊怡，更會帶對方返圍村拜年，感受傳統氣氛！
影星郭富城、羅仲謙與導演鄭保瑞昨日現身屯門，宣傳新片《西遊記之孫悟空三打白骨精》，三人坦言新片拍得相當辛苦，城城更指身穿野猴裝拍攝時最辛苦：「有兩個星期要着野猴裝拍，化妝時間好長，都要唔飲得水，因為着咗套衫去唔到廁所！」
着野猴裝拍攝辛苦
城城指今次演出是入行以來最辛苦，問有信心開續集？他表示：「真係冇諗過，呢四個月真係唔易捱，塊面都冇忽好肉，每日都要黐毛同着肌肉衫，拍文戲都好似跳Part舞咁！（對票房有信心？）希望每部都百花齊放，有好多唔同嘅片種，自己都鍾意發哥（周潤發）同星仔（周星馳），希望都有好嘅票房。」
早前被爆包場與女友睇戲的城城不欲多談戀事，問到會否包場請「朋友」睇戲？他說：「希望啲朋友自己包啦！新年會返香港宣傳，但大部分時間喺上海拍戲。今年除夕要工作，陪唔到屋企人食飯。（叫「朋友」陪屋企人食飯？）我都返唔到啦！（帶媽媽去上海同「朋友」食？）唔好講呢啲啦，我知道大家關心我，希望都係放番喺工作上。（情人節喺上海？）工作係工作。」
謙謙帶楊怡返圍村
而與女友楊怡頻傳好事近的謙謙，被問到今年會否考慮結婚，他笑說：「一直以嚟都有計劃未來，覺得合適嘅時侯就會將件事做得最完美。（求咗婚？）咁快？其實我依家都32歲，有計劃好正常。早兩三年都有諗將來嘅事，覺得呢啲係工作既動力。」
自言有點迷信的謙謙，偶爾而會向麥玲玲請教，問若對方指他今年適合結婚會否行動？他笑言：「咁呀，見到玲玲姐要當面問下佢，係先算啦！（35歲之前結？）自己就冇綁死自己。（生咗仔先結？）承你貴言啦！（問到幾時派雙封利是？）傷風？我好健康喎！（會唔會秘婚？）唔會，依家邊會有秘密。」而圍村長大的謙謙，更透露會帶阿怡返圍村拜年，感受傳統氣氛。
文：影視組