唐紫睿練拳捱打咬緊牙關偏向苦山行
「晶女郎」唐紫睿（Hazel）過去給觀眾的印象，也許是「性感」、「長腿」，但其實在風情萬種的背後，卻藏着一顆懷有夢想的心，剛過去的2015年，對Hazel來說，絕對是「不一樣」的一年，決心擺脫性感花瓶形象的她，接下綜合格鬥真人騷工作，接受猶如男拳手的操練方法，每日進行多個重型的格鬥、抗打訓練，期間還經歷父親中風的沉重打擊，但Hazel依然咬實牙關逐一面對，堅持到底！有較舒服的性感路不走，偏向「苦」山行，Hazel為的只是實踐夢想：「我想做一個出色嘅演員！」
教練伸一腳 痛到入廁所嘔
為了做真人騷，Hazel需要極速成為拳手，來應付拳拳到肉的綜合格鬥，再加上參加對手愛「窩面」（打面），Hazel更要努力練習抗打來保護自己，還試過在傷了的小腿骨上，猛力擠壓，來加強小腿的防禦力，猶如在傷口上灑鹽般的撕心痛，至今仍難忘。
「之前接受好多唔同類型嘅訓練，當中包括抗打訓練，因為上台除咗打人外，仲要畀人打，所以要習慣被打嘅感覺，咁樣先可以令自己被打嘅時候有反應，唔會呆咗，我差唔多日日都有練（指抗打），每日畀教練打，但又唔能夠還手，開頭好唔慣，真係會喊，個肚畀教練伸一腳，真係要入廁所嘔(口架)，手手腳腳又瘀晒，不過，唔練又點可以上台比賽，只好逐一去克服，希望能夠有最好嘅發揮。
為咗加強小腿嘅防禦力，我試過喺小腿受傷嘅情況下，用拳王油猛力擠壓對腳，令啲骨可以更加硬淨，被打嘅時候冇咁痛，壓腳嘅時候，感覺非常之痛，因為受傷瘀咗，仲要不斷咁用力壓，會痛到嗌出嚟，但壓完之後，啲骨確實硬咗，踢好耐沙包都唔會痛。」
壓力爆煲 失眠暴瘦
再堅強的人，都會有脆弱的時候，Hazel決定走實力路線，再辛苦的訓練都未有難倒她，不過，接受訓練以及拍攝新片《鴨王2》期間，卻接到父親中風入院的消息，雖然受到如此沉痛的打擊，但路也必須繼續行，邊去醫院探老父，邊繼續工作的她，壓力終告爆煲，曾出現嚴重失眠，需要吃鎮定劑紓緩。
「喺應付比賽、趕戲嘅期間，屋企突然發生咗事（指父親中風入院），所有壓力，好似由呢一個『點』，燃爆起嚟，令我去到一個唔能夠承受嘅地步，開始瞓唔到、食唔到，磅數仲愈嚟愈輕，咁好影響比賽，去睇醫生，醫生話我壓力太大，影響咗腦同賀爾蒙嘅分泌，食唔到、瞓唔到，係好正常，所以開咗一啲鎮靜劑、安眠藥畀我，但我都唔想太依靠，好差嘅時候，好似係咁發噩夢又或者完全瞓唔到先會食，之後，好彩識得慢慢放鬆番，由起初幾辛苦都好，都只會返屋企喊而唔去搵朋友傾，到最後識得開始同好朋友Share自己嘅情況，搵到情緒嘅出口。」
家人心痛 勸退出比賽
決心擺脫性感之路，接受各式各樣的挑戰，當中練打參加比賽，更令Hazel打到遍體鱗傷，就連家人、朋友都心痛她，為甚麼把自己「折磨」到這個地步，走一條如此辛苦的路，但Hazel絕不覺得辛苦，因她要圓一個屬於自己的夢，當一個出色的演員！
「有一次比賽，我叫咗媽咪嚟睇，我媽咪嚇到肚痛手震，最後仲喊咗出嚟，真係令我好後悔，但當時我只係想佢一心嚟支持吓我，估唔到嚇親佢，之後媽咪成日叫我唔好再打比賽，又話唔明白我點解要搞到自己咁辛苦，我啲親戚朋友都有一齊勸，又唔係屋企等錢開飯，點解女仔之家要咁辛苦，但其實我決定去打比賽，係希望證明畀大家睇，我可以做到好多方面嘅嘢同埋我嘅決心。
我明白走性感路線，唔可以一世，一定要搵其他出路，我依家除咗不斷練打外，仲有上演藝課堂，希望全方位增值自己，盡我所能去完成我一個夢，成為一個出色嘅演員！好多謝王晶同經理人公司一直畀機會我，我亦唔想辜負佢哋對我嘅期望，未來日子，我會更加努力，希望大家都畀個機會我啦！」
文：馮朝儀
攝：吳文聰
場地：九龍柔術（觀塘）