關淑怡風騷油髀搞氣氛冇句真
歌手關淑怡（Shirley）與二胡大師王憓首度台上合作，前晚在文化中心舉行《感覺．國樂 王憓X關淑怡X顧芮寧中西樂薈萃音樂國度》音樂會，久違的Shirley「凸肚」加「油髀」風騷獻唱，台上又自爆兒子想學二胡，但事後則說不要對她說話太認真：「唔係我點到你去冰島搵我男朋友。」
音樂會由王憓演奏二胡掀開序幕，之後Shirley以Deep V閃爆緊身短裙配毛毛褸造型出場，身形發福的她凸顯小肚腩。在王憓伴奏下演唱《繾綣28800bps》，未知是否音響未調校好，Shirley唱了數句即不慎破音，但她懶理繼續唱。Shirley演唱《窗內窗外》亦有不穩情況，唱畢後她亦為自己解畫：「做藝人係要聲色藝俱備，但我就欠咗一樣……唔夠靚，所以腳塗咗油靚啲，但點知啲油令我翹腳唱時，隻腳不停跣落嚟，搞到我唱唔到歌添。」
含淚聲獻亡母
及後，Shirley介紹另一位演出歌手顧芮寧（Elaine）出場，她指Elaine四歲便學彈琵琶，音樂造詣很深並非新人，但Shirley就多次將「造詣」讀成「造指」，嘉賓鄧建明亦大讚Shirley歌聲是「世上難求」，但Shirley卻幽自己一默笑謂：「唔走音嗰時囉！」她又選唱《一首獨唱的歌》送給過世的母親。據知她在開場前一小時綵排這首歌時竟激動落淚。而Shirley唱最後一首歌《地盡頭》時亦先聲明很難唱：「有乜閃失，記者唔好亂寫。」並趁機澄清：「唔係退休，亦唔係退出，唔好亂寫。」
台下唔准講仔
完騷後Shirley被問到是否很怕被亂寫？她笑言：「驚你個頭，我係搞氣氛咋！」講到雙腿太油影響演出，Shirley自言很重幽默感愛講笑，不要對她說話太認真：「如果唔係點到你去冰島搵我男朋友。（真係有男友？）講個名你飛去。」談到台上爆兒子對二胡有興趣？Shirley謂：「阿仔唔講啦，台上講就得，台下講就唔一樣。（兒子係咪跟王憓學二胡？）唔好啦，送多個耳塞先！你諗吓屋企有人拉二胡、小提琴會有咩感覺。」
文：音樂組