羅霖哭訴：佢講一套做一套！
現年51歲的美魔女羅霖，三年前自爆遭家暴兼離婚，與前夫劉坤銘更一直為贍養費公開互指不是。一個女人孭起頭家，要照顧三個兒子起居飲食，本來已掹掹緊，誰知平安夜再收噩耗。前晚她在新城慶功宴上，壓力爆煲哭訴收到前夫的律師信，驚聞對方只肯支付三個兒子的部分學費：「佢好似唔畀好日子我過。」一字一淚，聞者心酸。
藝人羅霖三年前宣布與劉坤銘結束16年婚姻，兩人曾一度為兒子撫養權及贍養費一事公開互數。羅霖自爆從冇收過夫家一毫子，有傳更反遭劉坤銘索取贍養費，不過遭劉坤銘否認。其後羅霖又爆前夫出招阻止細仔出席其生日會，與前夫的關係已達白熱化。
前晚羅霖以半百之齡，於《新城勁爆頒獎禮》中憑與馬嘉均的合唱歌奪「新城勁爆合唱歌曲獎」。前晚她出席慶功宴時分享得獎感受，興高采烈表示這是她復出以來首個樂壇獎項，作為樂壇新人能獲獎對三個兒子有所交代，證明三年來的努力冇白費。
細仔爆喊求復合
不過提到三個兒子時，她即收起笑容，自爆平安夜過得不平安：「平安夜收到前夫嘅律師信，話學費只畀到三分二或三分一，話公司人事發生問題。平安夜對我嚟講一啲都唔平安，我一個女人要面對好多問題。（擔心應付唔到學費？）擔心o架，依家三個仔同我住。呢三年對我嚟講壓力好大，如果佢加重我呢方面負擔，我真係唔係好明，就算佢畀唔到，劉家都應該照顧呢三個孫！」她更透露細仔於聖誕節向她表示希望她與前夫回到未離婚時，令她忍不住哭泣說：「我同佢連續講三次對唔住，唔可以返番去，但希望佢開心，始終呢樣嘢會影響小朋友。」
出年赴美國讀書
昨日羅霖接受電話訪問時，坦言收到律師信至今，心煩意亂：「一向係我負責三個仔嘅生活費，劉生負責三個仔學費，依家佢話只畀三分一或三分二學費。好煩！啱啱以為settle咗，之後又要來來往往律師信。如果要我支付部分學費，會非常吃力，因為第二個仔出年就去美國讀書，學費都好多，依家叫個仔同爸爸傾吓。暫時未決定點好，好心淡，佢好似唔畀好日子我過。」提到細仔希望她與前夫重返三年前未離婚的心願，羅霖語帶哀傷表示：「我哋初初離婚時，細仔都講過一次，之後冇再講，我以為個仔接受咗，但早幾日佢又講。原來個仔一路放唔低，好難過，攬住一齊喊。」
對於前夫劉坤銘揚言不會讓兒子影響學業，定會助他們完成學業時，羅霖憤怒謂：「如果佢再同人講一套，同我講一套，必要時，我會公開律師信內容。」早前羅霖與助手現身銅鑼灣飲茶，見她離開時途經商場時裝店，都只是齋睇冇買，之後更到商場櫃位取泊車優惠，實行慳家慳到盡。
文：名人組