Twins成軍15年心態變 名利雙收滿足戲癮

S：蔡卓妍、G：鍾欣潼

為演唱會犧牲

步入成軍15年的Twins將於今年尾假紅館舉行跨年演唱會，為了專心籌備演唱會，兩人把電影撇開一邊。一直有腰椎傷患的阿嬌坦言為免病情惡化，曾想放棄打戲，但最後發覺始終愛拍動作片，至於演技愈趨進步的阿Sa則謂想挑戰成熟的角色。

G：其實都有好故事嘅電影搵我，係兩套打戲，一套係講kickboxing，一套就真係打得好勁，但我唔想喺演唱會之前再受傷，而且喺演唱會前抽唔到時間拍戲，雖然呢個機會係好好，但我覺得演唱會重要啲。其實我有諗過唔好再拍動作片，因為依家個身體咁樣，但我真係好鍾意動作片，因為我反應好快，所以希望身體快啲好番，打戲全部推晒去演唱會後。

Twins出道初期經常表演側手翻，令人印象深刻。	熱愛演戲的阿Sa表示不會為攞獎而揀戲。	阿嬌雖暫未有結婚的衝動，但都想將來可以搵個好老公。

S：大部分可以喺下年嘅電影都已經延遲咗去演唱會之後先拍，因為我唔可以將全副心機擺咗喺演唱會，但同時又要拍戲。依家都傾緊兩部電影，有一部係幾得意，係懸疑追逐，但唔係鬼片，而有一套就係講女性，但暫時唔可以講做咩角色。（拍過咁多套戲，仲有咩角色想做？）好多都未試過，我覺得最主要係好多角色都真係需要嗰個演員有番咁上下經歷同年資，先至可以拍到。（即係想試成熟啲嘅角色？）可能會成熟啲，到我可以真係演到嘅角色。

阿Sa在電影《雛妓》中有突破的演出，令她一嘗角逐影后的滋味。	成軍15年的Twins一直互相扶持，姊妹情深！	阿Sa不時向阿嬌介紹有潛質的男仔。

盼望發揮演技

今年阿Sa憑電影《雛妓》的破格演出提名影后殊榮，但她坦言不會為博攞獎而特地揀電影來接，亦笑言不太需演技的電影以前已拍得多，現時希望能接拍一些有所發揮的角色。兩人亦坦言努力工作多年，現終可享受生活，不再被事業主宰生活。

S：最緊要係個故事，唔係要為破格而破格，一套戲個故事係主導成件事。（《雛妓》反應咁好，恨唔恨快啲有部戲可以攞獎？）呢樣唔係話你恨就有。（可能特登揀戲？）冇得預計邊套戲可以攞獎，同埋係要做得好先得，仲有拍攝鏡頭、最終剪接好唔好，咁多嘢點預得到，最緊要依家我係拍一啲我覺得可以發揮嘅角色，唔係好需要演技嘅戲就拍得太多，好彩我哋出道得早，嗰陣傻更更咁做呢份工，目標淨係要把握所有機會，努力做好工作，但經過咁多年之後，依家成就又有啲，錢又有啲，樣樣都有啲，所以依家終於可以真係做一啲自己想做嘅嘢，唔會有太多憂慮，要撞嘅板都撞晒，所以依家最緊要係好好咁生活。以前可能係事業主宰我嘅生活，但依家調番轉，事業只係我生活其中一部分。

G：心態變咗，好耐之前已經講話好想有多啲生活，而唔係淨係工作，以前係每日我哋都見面同做嘢，好想過番啲有自己生活嘅日子，依家開始慢慢可以做到。

着緊姊妹愛情

雖然在事業上得到成就，但愛情對女人亦是十分重要，雖然阿Sa最近跟陳偉霆甩拖，跟阿嬌同樣成為單身貴族，但她未為自己擔心，反而戥單身兩年的阿嬌肉緊，更經常為阿嬌介紹對象，但可惜深入觀察下去，那些男仔就連阿Sa關都未能過到！

G：我之前去咗比利時做李小冉嘅姊妹團，去到婚禮好感動！不過我暫時未有結婚呢個諗法，太遙遠啦。（想快啲識番個男仔？）暫時冇話有想拍拖嘅衝動，但見到朋友搵到個咁好嘅老公，我都希望我將來可以搵到。

S：你都可以o架！

G：（阿Sa介紹啲男仔畀你識？）佢成日都有o架，話有啲人，我就話OK啦，跟住就冇咗件事。

S：如果我發掘到啲幾好同有potential嘅男仔，我會同佢講，但我會再觀察吓先，但可能因為我真係衷心希望可以有一個好好、好錫佢、照顧到佢、又同佢好夾嘅人可以愛佢，所以變咗有時當我再深入觀察時，就連我個關都過唔到。（你要求太高？）可能係，但因為我錫佢，所以我要求會更加高，不過我從未冇擔心佢（結婚）呢方面。

G：可能我要求仲高呢，我都冇擔心到。（咁耐都冇人過到阿Sa嗰關？）又真係差咁啲。（差咩呀？）唉，真係唔好提。

後記：心有靈犀

15年感情果真並非浪得虛名，訪問時Sa嬌會認真聆聽對方說話，不時你一言我一語，又會如孖妹般，心有靈犀地一起講出某句說話。講到「陳偉霆」這個話題，阿Sa明顯不想多談，阿嬌即合拍扡為阿Sa解圍，幫手扯開話題，可見兩人姊妹情深！

文：音樂組

攝：吳文聰

場地：如心南灣海景酒店

髮型（鍾欣潼）：Wil Tam@Salon Amarone

化妝（鍾欣潼）：Circle Cheung(ndnco.co)

服裝（鍾欣潼）：Chorux@Runway Workshop

髮型（蔡卓妍）：Kate Shek@Hair Culture

化妝（蔡卓妍）：NatalieSoo.ki@ND&Co