蔣家旻升呢阿媽 離家出走

感謝《愛‧回家》

《愛‧回家》中的「馬子妮」可算是蔣家旻（Angel）的成名作，她坦言這個角色是入行8年來最重要的踏腳石。她又直言不怕被定型，就算再演同類型的角色，Angel都有信心衝破觀眾心目中的既定印象，而入行一段日子，她坦言要感激的人不少。

「最初冇諗過會拍3年咁耐，因為反應愈來愈好不斷加集數。頭一年未見到成果，一年後先發覺真係好多人鍾意睇呢套劇同埋鍾意『馬家』！『馬子妮』好深入民心，可以話係我暫時嚟講嘅代表作，希望將來有機會突破。

「演每個角色都唔會有舊影子嘅演員係最叻，我都想喺演同類型角色嘅時候，識得演繹到同之前唔同。所以我一直都認為要做好依家嗰個角色，啲監製先會畀更多機會我去演其他角色。一定要多謝《愛‧回家》，如果冇呢套劇，我唔知要拍幾多套先有個角色咁入屋。」

從小就想做演員的蔣家旻，以周迅及佘詩曼為事業目標。	慶幸認識一位成熟男友，讓蔣家旻在各方面都可獲得正確指引。	蔣家旻視《愛‧回家》為目前為止最重要的作品。

愛不是遊戲

在《警》劇與梁烈唯扮演兩公婆，現實中Angel亦與男友感情穩定。拍劇做人妻，不多不少為自己「成妻之路」打了底，雖然Angel直言對結婚生B仍未有概念，但望住身邊朋友榮升人妻人母，仍不免有點恨嫁。

蔣家旻挑戰大肚婆角色，與梁烈唯有大量對手戲。	蔣家旻將與朱千雪等在新劇演出。	蔣家旻期望到了適合年紀，才踏進人生另一階段。

「劇中同唯唯嘅角色係反映時下某部分年輕人做事衝動，而女仔就大多會比男仔早熟，所以我鍾意另一半見識多、夠成熟，識得教我，令我進步。我最欣賞男朋友思維成熟，佢年紀比我大，亦好了解演藝圈；待人接物方面，佢都會細心教導到我，生活上又好特別照顧我、遷就我。我自己慢慢長大，會追求細水長流、有默契嘅感情。對我嚟講，愛情、婚姻唔可以兒戲，我比較step by step，所以需要長時間相處、了解、磨合。

「愛情方面係隨緣，不能否認有時睇到朋友結婚，或者睇到靚嘅婚紗，都會幻想吓自己嘅未來會點，同埋我希望喺最美好嘅歲數踏入人生新階段！對我嚟講，我需要事業發展得夠穩定，有足夠能力照顧到家人，先會再去諗下一個step。」

挑戰大肚婆

投身娛樂圈拍劇多年，Angel坦言熱愛表演，小學開始就夢想成為演員，直到現在加入無綫8年，目標由始至終未曾改變。參演新劇《警犬巴打》的Angel，挑戰做媽媽的角色，與以往角色有很大分別，更首次扮孕婦。

「以前啲角色就算係任性得嚟都會有計劃同主見，但今次就性格衝動，讀完書就同唯唯（梁烈唯）閃婚，不顧後果咁有咗BB。第一次做孕婦，為咗投入角色，將平時喺街留意到孕婦嘅坐姿同行路方式應用出嚟，亦有請教媽咪同生過BB嘅同事。

「獎項提名往往係額外嘅鼓勵，演出每一個角色，尊重自己夢想永遠係我嘅大前提。我相信帶住熱愛同努力就會得到更多機會，對我嚟講，視后需要具備嘅條件，係擁有人生閱歷，配合天時地利人和，一班幕後精英、好劇本、一個深入民心嘅角色，加上演員將演技發揮得淋漓盡致。」

「我會以周迅同佘詩曼為目標，佢兩位將所有時間放喺演戲上面，做唔同角色都唔會令人覺得重複。同埋我好鍾意啲感覺好硬淨嘅女性，但係當做柔情戲又可以發揮到，我都好想有一日可以用實力去證明畀大家睇！」

後記

拍畢《警犬巴打》後，Angel在再迎接另一套新劇前，到哈爾濱拍攝《三日兩夜》：「好難得了解到哈爾濱嘅中俄文化同埋東北人嘅性格，又睇到珍貴嘅北極動物，仲近距離接觸白鯨、親手餵東北老虎同獅子食嘢，可以話係寓工作於學習及娛樂！」

文：陳丹

攝：劉斌

場地：PizzaExpress @ 永豐街

服裝：Rosebullet

髮型：Leo Yiu @ Salon Osmosis