高海寧搵好男人 共度童話聖誕

現年28歲的高海寧（高Ling）每逢聖誕都於工作中度過，她盼望將來能過一個難忘的白色聖誕，特別想去芬蘭的聖誕老人村：「嗰個地方畀人形容到好似童話世界咁，有時想放個假脫離吓現實，去一個好有聖誕氣氛、好似童話世界入面，放鬆吓自己。（計劃幾時去？）搵到另一半就即刻去。」

自細憧憬結婚

雖然未獲男仔相約過節，但高Ling表示自己和父母都未着急，她又自言很保護自己，會小心物色對象盼覓得真愛：「我覺得要睇啱，入咗呢行後識朋友要好小心、要識保護自己，當然你當我係普通女仔，我梗係最開心啦，但冇可能（口架）嘛！我哋多重身份又係公眾人物，做任何事都需要同公眾交代，變相要好小心處理事情，所以我想搵個穩定嘅公開畀大家知，等大家祝福我。」

提到好姊妹張嘉兒、宋熙年等陸續結婚，單身的她直言自幼憧憬結婚，又謂現以結婚為目標搵對象，她說：「因為父母感情好好，所以好細個已經好憧憬自己有個好幸福嘅家庭，但我其實仲係好細個咋，未急住將自己嫁出去，所以可以慢慢搵，我驚一心急會揀錯。」

賺錢未雨綢繆

今年聖誕，高Ling繼續趁機賺外快，她說：「趁後生賺錢先，將來結婚生仔可能要多啲時間畀家庭，變相少咗工作時間，橫掂我又未有男朋友，有就話聖誕節去浪漫吓啫！」

文：影視組　

攝：司徒國榮　

車輛：Auto Italia