阿倫孭三嫂走佬獲封「雜貨舖」

前晚譚詠麟（阿倫）與戚美珍在上環拍攝電影《江湖喜劇》，劇情講述阿倫孭着三嫂避開仇家追斬，已多年沒拍戲的阿倫寶刀未老，先後孭着真人及假人公仔拍攝，雖然拍了多個take，但轉身踢腳仍然敏捷。阿倫向三嫂及伍姑娘笠高帽說：「今次拍戲有兩美相伴，係拍攝福利。（動作戲輕而易舉？）頭先冇為意，個假人鼻哥好尖，畀佢『銀』咗額頭幾下，不過冇事。三嫂要拍瞓地，平時我見佢食飯，對筷子都洗幾次，應該畀苗僑偉睇吓，辛苦錢呀！」

激讚身手靈活

天寒地凍拍瞓街戲的三嫂說：「冇諗過要瞓街，但OK嘅，拍得過癮搭夠番。（唔怕條街污糟？）我個人本來都好愛清潔，有潔癖，但投入咗角色，完全唔為意。（覺得阿倫身手點？）佢名副其實雜貨舖，要乜有乜，乜都畀到你，可能佢每個禮拜踢四日波，身手好靈活！」

阿倫孭住假公仔再向後出腳，身手非常敏捷。	有潔癖的戚美珍豁出去瞓街拍攝。	阿倫在片場不停放笑彈。

伍詠薇拍到癲

伍姑娘則被阿倫爆她與男對手有「床上動作戲」，伍姑娘哈哈笑說：「今次我哋合作得好癲好爽，乜都傾、乜都講，所以我戲份殺青咗，都專誠落嚟探班，我要搵三嫂合照呀，希望快啲再合作拍下一套！」

文：影視組