陳國邦唔介意回頭草：好食就食！
無綫戲劇組因高層權力鬥爭而「變天」！隨着無綫行政總裁李寶安下令全面整頓戲劇組後，有藝人被打入冷宮，亦有人受力捧及回巢，如早前宣布不續約的陳國邦，獲高層杜之克親自出擊打動後決意回歸，而曾鬧爆無綫拍劇冇劇本的鄧萃雯，亦將回巢擔正新劇，被指吃「回頭草」的國邦謂：「我唔理係咪回頭草，好食嘅草我咪食。」
盛傳無綫兩大高層余詠珊與曾勵珍大鬥法，引致戲劇組近日重新執位，有指綜藝科製作資源總監余詠珊空降戲劇製作部，令原本的戲劇製作總監曾勵珍遭削權為顧問，不過無綫隨即發聲明否認，據昨日《好報》指，無綫集團行政總裁李寶安下令重新整頓戲劇組，銳意令無綫重振電視王國聲威。李寶安昨接受訪問時，表示要以「優化」形容整頓戲劇組更適合：「依家市場競爭大，唔突出就落後，聞戰鼓思良將，所以無綫盡量招攬人才返嚟。」
做好創作製作
李寶安說要重點做好創作及製作，並讚助理總經理杜之克是人才：「佢上場係協助曾勵珍，等曾勵珍可以集中處理平日事務，杜之克可以做番自己製作方面，加強藝人管理同資源，同做有關藝人協調，盡量唔重疊藝人出鏡率。」
為優化戲劇組，李寶安點名杜之克及余詠珊聯手出擊，大包圍收兵，演員方面亦來個大執位，杜之克亦聯絡早前高調宣布與無綫分手的陳國邦，以誠意力邀他回巢，最終國邦答應。據知國邦回歸頭炮，乃明年2月開拍的全新處境劇，他將與同是好戲之人的黎耀祥及毛舜筠鬥戲。曾多次公開批評無綫的視后鄧萃雯，據知余詠珊已為她度身訂造擔正新劇《不懂撒嬌的女人最苦命》，利誘她重返無綫。
曾勵珍曾致電
陳國邦離巢兩個月後重返無綫，有不少網民支持，但亦有人認為他不應吃回頭草。對此，國邦笑指好草不怕吃：「唔係同無綫鬥氣，當時我辭職係因應當時心情，唔開心咪離開。但依家呢刻，我得到咁好待遇，又有咁想合作嘅組合毛舜筠同黎耀祥，無綫又好有誠意，我亦都因為呢刻好想返去做，咪簽番。我唔理係咪回頭草，好食嘅草我咪食。（走咗兩個月就返？）係，傾回巢呢個過程我都覺得幾曲折。（杜之克親自搵你？）係，佢第一個搵我，佢好有誠意，第二個令我返去嘅原因，係有我好欣賞同好想合作嘅毛舜筠將會同我拍劇，毛姐打過畀我，珍姐（曾勵珍）亦有搵我，種種原因加埋令我想返無綫。」
國邦指「回家」後有加人工，但非驚訝數字，更指錢不是重要原因，反而是工作上得來的滿足較重要。將於明年開劇的他，被問何時返無綫簽新約？他謂：「原本份約到今個月底先滿，所以新約唔使急，忙完手頭上工作，聖誕後會返公司搞。」而雯女至截稿前尚未聯絡得上。
文：影視組