陳志健生蛇素顏追job
藝人陳志健（Otto）早前患上俗稱「生蛇」的帶狀疱疹，左邊面勁爆紅疹。由於紅疹相當礙眼，正拍攝《愛‧回家》的他向無綫緊急請假。他說：「好多謝公司同埋劇組，因為生蛇嚟得太突然，我同公司請假一星期，《愛》劇組都好幫手調咗啲拍攝次序，跳咗我啲戲份，等我可以返屋企抖吓。（唔怕傳染太太羅苡之？）我都好小心處理自己敷過面嘅毛巾，同埋有得休息就好啲，唔使下下出完街又再清潔塊面。」
Otto日前覆診完畢，但患處一帶仍然痛似蟻咬、火燒，他說：「抖咗一個禮拜，食咗藥、搽咗藥膏，啲紅疹結咗焦，叫做好番好多。（繼續請假？）冇啦，其實劇組之前已經就咗我，我都要追番之前落後咗嘅進度。（冇得化妝？）冇o架，素顏示人囉。」
