葉世榮掛住囡囡開騷忘詞
葉世榮最近推出成為人父後的首張專輯，講起三歲愛女，Rock爆的世榮不禁慈父上身，坦言升呢人父後凡事以家庭為先，又自爆試過太掛住囡囡而搞到演出時忘記歌詞。提到兩位好兄弟黃家強和黃貫中水火不容，他坦言無法化解兩人恩怨，很難判斷誰對誰錯，但相信時間會沖淡一切。
Beyond在1999年宣布暫時解散後，成員各自發展，葉世榮亦獨自展開音樂事業。相隔三年，他推出重金屬風格的《引以為榮》專輯，其中《貪嗔痴》一曲就跟現時分屬同門的馬來西亞異種樂隊合唱。世榮表示：「19年前同佢哋合作過，直至之前我聽完佢哋首《貪嗔痴》好有感覺，好想同佢哋合唱，就飛咗去馬來西亞搵佢哋。」得到世榮提攜，樂隊主音司徒坦言很開心，感謝「大佬榮」一直支持及教導。
凡事以家庭為先
音樂事業發展順利，世榮現時的家庭生活亦相當美滿。三年前升呢人父的他坦言現時以家庭為先。現時世榮和妻女在北京居住，但今次到處宣傳則要暫別她們數星期。他說：「我走嗰陣佢喊o架。（心痛？）梗係痛啦，之前北京宣傳演唱會有啲唔記得歌詞，係因為當日晏晝我要去現場試聲，個女捉住我唔畀我走，喺露台係咁喊住叫『爸爸』，搞到我搭車個心 都翳住翳住，當晚仲唱錯歌詞。」他大讚愛女有音樂天分，尖叫聲很大，但則不及好友黃貫中（Paul）的女兒「Rock」。
提起Paul，不禁令人想到他跟黃家強不和，世榮坦言無法化解二人恩怨：「化解到我攞到諾貝爾和平獎啦！等於巴勒斯坦同以色列咁，慢慢啦。（冇干涉佢哋？）佢哋啲誤解或人生觀點好難干涉，我只係用一啲人生道理去令佢哋領略，佢哋之間邊個啱邊個錯冇得講。（Beyond搞成咁唔開心？）反而冇話唔開心，因為Beyond已經解散咗，對重組呢個概念個別成員有個別講法。2013年30周年咁重要嘅日子，我都宣布唔想做，見解同家強一模一樣，就係家駒都唔喺度，重咩組啫？我寧願放棄咁大嘅收入，行自己嘅路。」
盡努力集齊Beyond
雖然不會重組，但世榮仍希望三人能夠重聚，合體舉行紀念黃家駒的慈善演唱會，以宣揚及延續其愛心。他已鐵定明年家駒生忌6月10日舉行演唱會，會盡最大努力希望當晚Beyond齊人，因他相信時間會沖淡及治好不舒服的事。
文：音樂組
化妝：Hetty Kwong
髮型：Mathew Kong and Pamela Chan@Headquarters