楊秀惠拍拖隨緣 收溫暖牌頸巾
無綫小花楊秀惠（Vivien）今年拍了多套劇，並有出色表現，其護膚品生意亦愈做愈好！提到感情事，Vivien未有回應被拍到與緋聞男友見面，只謂會隨緣。她更教大家送禮秘技，又表示最近收到溫暖牌頸巾，覺得很感動。
臨近年尾，楊秀惠已忙完拍劇，但向來致力搞護膚品生意的她坦言，聖誕會很忙碌：「呢啲日子係送禮高峰期，聖誕前開始忙，之後就1月1日，跟住又到農曆新年同情人節，一直都會忙，不過都會抽時間搵朋友慶祝。」
工作狂嚇親異性
談到早前被拍得與一男士撐枱腳，Vivien謂：「朋友唔係男就係女，男士們都可能畀我嘅工作嚇親，覺得做藝人好忙，所以感情事都係順其自然。」
來自馬來西亞的Vivien直言香港更有聖誕氣氛：「聖誕同好朋友或者家人整嘢食一齊慶祝最開心，以前喺馬來西亞會同一大班朋友搞派對，依家香港天氣亦比嗰邊涼， 感覺更浪漫。最難忘細個嗰時搞派對玩交換禮物，當時有同學整蠱大家，包咗成大卷廁紙當禮物，抽到嘅人打開之前覺得好開心，因為好大份，點知一拆開就笑死！」
喜歡收實用禮物
講到送禮物，Vivien分享了她的心得：「一定要實用，希望對方用得着，自己收亦都鍾意收實用嘅嘢，價錢唔使貴，係體貼嘢就得。（如果有男友會唔會親手織頸巾？）我唔識織，哈哈！但今年我就收到一份，因為我有做義工，一路有探訪有需要幫忙嘅人，有日我去到嗰度，佢哋送咗條親手織嘅頸巾畀我，嗰刻好感動，第一次收到親手織嘅頸巾，好有意義！」
文：陳丹
攝：吳文聰
場地：Isobar(Gaia Group)
服裝：WHYRED
髮型：Tim Chong@LA BIOSTHETIQUE