龔嘉欣要專一男摸清先愛
龔嘉欣昨日出席無綫劇集《刀下留人》宣傳，被問到傳與吳業坤譜姊弟戀，她強調只大對方四個月，但讚緋聞男友有才華，怕花心而要時間觀察。
聖誕快到，一班《刀下留人》演員黃德斌、邵美琪與龔嘉欣等昨日到社區中心與眾同樂，玩魔術又派禮物。席上，嘉欣被問到有傳歌手吳業坤正對她展開追求，並以「姊弟戀」來形容，她聞言即澄清自己只是大對方四個月，但讚緋聞男友有才華與得意，嘉欣說：「佢人紅是非多，大家合作拍劇，難免有新聞。（早前被拍到一起吃早餐？）其實係好簡單嘅一件事，我哋冇避忌。」
見過鬼怕咗黑
問到有指吳業坤正展開追求？嘉欣稱愛情並非自己生活中的頭三位，目前是工作第一：「可能佢有心儀女仔呢！隨緣啦！我要花時間去觀察吓先。（可以考慮？）交朋友都要觀察啦！睇清楚究竟啱唔啱自己，可能對方花心呢！我心目中想要專一、成熟嘅男仔！（有陰影？）都係o架，見過鬼仲唔怕黑咩！」
邵美琪唔爭仔
同場的邵美琪表示聖誕會出席香港的聖誕派對，笑言只會參加男性為主的派對，免得與其他女性爭。問到黃德斌會否介紹異性給拍檔邵美琪認識？他表示對方已經有很多朋友。對於早前被拍到與女友手推BB車，德斌說：「BB係朋友嘅，覺得得意可愛先帶出街。（何時生？）一切隨緣會努力。」
文：影視組