譚淇淇甩拖閉關聽歌
女星郭奕芯（Ashina）、譚淇淇（KiKi）、李嘉琪及布睎尤（Raico）相約到海洋公園食聖誕大餐預祝佳節，提到最難忘聖誕，KiKi表示去年單身兩年，突然「Dry感大發」閉關在家聽歌，但她笑說：「其實係一日啫！其餘日子都係約朋友去玩。（今年有男仔約？）年年都有！唔使拍拖，男同女都可以約我！」
去年自爆Dry的Ashina表示今年「睇開咗」：「識多咗新朋友，可能又長大咗，覺得唔一定要出街玩。（想要浪漫聖誕？）想呀！但要睇身邊係咩人，唔心急，同朋友過都可以玩到好癲。」Raico表示最難忘有年獲男友送贈99支玫瑰；至於《中國好聲音》香港代表嘉琪表示有年平安夜倒數，卻趕時間睇戲，要不停Say Sorry叫群眾「借歪」。
場地：海洋公園