葉翠翠調教老公共度造B之旅
今年7月與老公周曉東拉埋天窗的葉翠翠升呢做幸福人妻，不時冧爆大讚老公好錫自己！仍處新婚階段的二人將度過婚後首個聖誕節，翠翠透露老公早已book好餐廳，並會到外地作短線甜蜜之旅，問到會否趁機「造人」，她坦言生B計劃一直在進行中！
前港姐冠軍葉翠翠入行十年，月前榮升索爆人妻踏入人生另一階段，她坦言婚後未有大改變：「老公都係好錫我，我脾氣都係照舊，惟獨日常生活樣樣嘢佢都好照顧我。」兩公婆即將度過婚後第一個聖誕，翠翠取笑老公不夠浪漫要她費心「調教」：「一直都覺得佢唔係浪漫嘅人，但佢就話自己好浪漫！佢講嘅浪漫好搞笑，揸開篷車去沙灘，我就話『吓！咁凍！』佢可能要適應吓我講嘅浪漫，book間餐廳食飯、有紮花收，再有啲花心思嘅禮物好似整張卡咁，其實好standard啫。」
遊希臘嫌太曬
葉翠翠續說：「今年佢book咗餐廳，同埋會去幾日旅行，開頭佢諗住去馬爾代夫，我話唔好，因為之前去土耳其同希臘去咗廿日曬到好驚，兩三點都唔敢離開酒店，未試過曬得咁犀利，所以今次都係揀番日本、韓國、台灣呢啲地方。我去旅行鍾意睇得意嘢，好多人以為去日本都預咗一個篋去兩個篋返，但我係一個篋去半個篋返，因為用晒帶去嘅護膚品反而少咗嘢帶返嚟，啲嘢香港都有得賣，可能只係貴20蚊，最多都係買吓藥。」
送自己畀老公
翠翠曾多次公開表示想生B，問到會否趁聖誕之旅「造人」？她說：「其實生小朋友嘅計劃已經開始咗，我希望所有嘢喺掌握之中。」婚後兩人亦不再講究於聖誕禮物上，翠翠笑言送給老公的最大禮物就是自己，她說：「佢當初憑自製嘅卡呃我返嚟，今年我諗都冇o架喇，因為都呃到啦！上年佢仲送咗好多份聖誕禮物畀我，有相架、旋轉木馬嗰啲好唔等使嘅嘢，今年叫咗佢唔好買。我就多數送日用品，上年送咗鬚刨呢啲佢可以用嘅嘢，今年慳番唔送喇，我都送咗自己畀佢啦！」
文：陳丹
攝：黎志輝
場地：JAR Just-a-Restaurant