子丹等拍第四集 弘揚葉問精神

甄子丹、張晉、黃百鳴、吳千語及熊黛林等前晚現身九龍灣，出席馬百良呈獻《葉問3》香港首映禮。子丹太太汪詩詩與子女到場力撐，場面溫馨，子丹在台上笑言沒有收片酬，又笑指老闆黃百鳴「o依o依哦哦」呻唔夠錢。

以藝術行先

事後子丹接受訪問，笑指「零片酬」只是搞氣氛，但談到黃百鳴呻不夠錢，他則說：「啲老闆成日都話唔夠錢0架啦，又話啲演員收得太多，最後咪都係笑到四萬咁口，又話開拍第四集，老闆同演員唔同，老闆係以生意為出發點，演員係以藝術、創作為出發點。（預計開幾集？）唔知，我都冇諗到要第五年先拍第三集，黃百鳴一直等導演葉偉信，係佢先拍到呢種感覺同精神，希望再拍唔使等太耐。」

全世界都識

子丹又指《葉問》系列已累積了不少粉絲，對票房成績有信心，他說：「呢八年去到全世界，大家都叫葉問，呢個我值得自豪，亦都值得繼續製造一個夢畀全世界，《葉問》唔只係一部電影，佢係全世界一種精神。睇電影都係想得到希望、鼓勵同啟發，我覺得《葉問》係做到呢一樣嘢。」

子丹與在場粉絲玩自拍。	左起：甄子丹、張晉、黃百鳴 子丹笑說老闆黃百鳴呻唔夠錢。	陳國坤（左起）、吳千語及張繼聰擺出詠春手勢。

而張晉坦言家人不捨得他因拍戲受傷，但更希望他能夠在幕前發揮：「如果我為咗唔拚搏而唔去拍電影，我自己都唔忿氣啦，所以多啲嚟密啲手。」

文：影視組