霆鋒冧粉絲有求必影

謝霆峰昨日現身太古城中心有份投資的「鋒味曲奇」店內，與另一名老闆楊鼎立（Derek）同招待十多名粉絲，品嘗霆鋒親自研製的多款曲奇。霆鋒像廚神上身般，細心講解曲奇的味道、特色及成分等，十分內行，霆鋒廚藝出眾，精通中西菜式，甜品、曲奇都十分耍家，粉絲當然洗耳傾聽。

食極都咁Fit

霆鋒讓粉絲逐一試食曲奇後，即場做民意調查，粉絲大讚曲奇美味，試食完還要買回家慢慢歎。期後，霆鋒跟粉絲大合照，平日Cool爆的他極之親民，有說有笑，還主動代粉絲拿手機一起玩Selfie，作零距離接觸，即場冧暈一眾粉絲，又識做地一一替粉絲的曲奇盒簽名。

霆鋒提到何以會出現店內時說：「我成日同Derek因為曲奇餅o既味道拗，我話不如做個民意調查，咁耐以o黎我都未問過大家o既口味，今日就畀大家試食吓，最好遲啲可以開埋廠房畀大家試。（啲曲奇係你研製o既？）大部分係，咁都有師傅幫手，全部食譜都係我諗o既，我晚晚都諗，晚晚都一盆盆咁試食。（食咁多都咁Fit？）就係淨係食曲奇，唔食其他嘢o架喇！依家啲小朋友好勇於嘗試，我覺得啲基本嘢做得好過人就得，Derek就癲啲o既，咁我哋攞個平衡，過程都好開心。」

霆鋒親自揸機同粉絲玩自拍。	霆鋒、楊鼎立（右）向試食曲奇的粉絲細心講解。	霆鋒在場外亦大方跟市民合照。

聞女友即封口

霆鋒測試粉絲口味的方法是以其他品牌曲奇混合他的曲奇給粉絲試，他說：「結果佢哋一致揀咗我哋o既曲奇！依家我已經諗好新年o既款式，造曲奇仲要諗得遠過拍戲，好Crazy。（女友王菲有冇試你啲曲奇？）唔講呢啲啦。」他離開時，店外圍觀的數十名市民紛紛上前要求跟他合照，霆鋒來者不拒，Nice指數爆燈！

文：名人組