Demi講完愛你 撻低瘀爆

人氣歌手Demi上周五於紐約麥迪遜廣場公園出席《Z100's iHeartRadio Jingle Ball》聖誕騷，現身紅地氈時仲打扮好密實，僅以黑色樽領襯短裙騷腿，名副其實包到上頸，但到在台上演出時，Demi就有誠意好多，換番黑色吊帶背心配熱褲晒至hot body，輕微谷胸騷事業線。

網上大方自嘲

Demi起初絕對是狀態大勇，唱足20分鐘都無難度，唱到《Cool for the Summer》一曲時全場氣氛熱烈，不過卻唔好彩嚟個「臨尾香」，當Demi答謝完粉絲支持：「紐約！好快就會跟你再見面！我愛你！」竟然唔小心被個咪高峰絆倒，當場如撻生魚般向後撻，搞到當着數千名觀眾面前仆到四腳朝天，相當失威！

換上透視裝的Selena在台上勁歌熱舞。（美聯社圖片）	Nick（圖）與兄長Joe亦於同一聖誕騷演出。（美聯社圖片）	Joe（美聯社圖片）

不過，好彩Demi未有因此受傷，雖然聖誕騷是現場直播，但Demi仆親一刻剛巧攝影機轉向拍攝觀眾，未有將Demi瘀爆一幕直播出街，算是不幸中的大幸。事後Demi仲不忘大方攞件事來講笑，於社交網站Twitter留言：「你們到現在還未明咩？只有夠cool的小朋友才會在台上跌倒。」認真大方。

Selena勁歌熱舞

另外，當日同場還有「過氣舊情人」Selena Gomez與Nick Jonas，Selena穿上白色低胸連身裙現身，大晒事業線，其後換上兩件透視裝台上勁歌熱舞散發性感魅力，據知二人全日未見有交流，但Selena反而就同另一緋聞前度DJ Zedd一起獻唱，Zedd其後上載二人攬住合照，留言話同他喜歡的Selena夾歌表演，疑似向Selena最近的緋聞男友、英國組合One Direction成員Niall Horan挑機，不過就有指Niall完全不介意。

文：外娛組