鄧佩儀撞爆嘴要戒口
藝人鄧佩儀（Gloria）前晚為《歡樂滿東華》表演雙節棍，籌得20萬，卻不慎撞傷左下唇引致流血：「我表表吓演食到血，好彩唔係打到面，如果打到面會留疤！（訓練唔夠？）係意外，頭先照鏡我都嚇親！」她昨日與翟威廉到坑口宣傳《萬千星輝頒獎典禮2015》，她指傷口已結焦：「醫生話冇大礙，一兩個星期會好番，暫時唔可以搽唇膏，我會照做飲食節目，但要戒食煎炸同辣。
（戒埋錫錫？）平時都冇錫錫，係錫媽咪囉，但佢喺外國錫唔到，佢好擔心我會留疤！」
翟威廉有份角逐「最佳男配角」及「飛躍進步男藝員」，他說：「『飛躍』我睇好楊明同黃子恒，『男配角』就除我以外，個個都睇好！（緋聞女友陳庭欣冇提名？）出年啦，如果出年有提名，我幫手拉票，其實佢做《東華》主持幾好吖！」
