有「英國時裝奧斯卡」之稱的年度時裝界盛事英國時裝頒獎禮（British Fashion Awards），早前於大劇院圓滿舉行。雖然當晚天氣寒冷，不過一眾出席的女模歌手等大都性感現身，以迷人戰衣上陣行紅地氈，完全無懼寒風，誓要以最漂亮造型示人，盡騷個人時尚衣着品味。名模陳嘉容就大讚英國索模Rosie Huntington-Whiteley靚絕全場，完美演繹了simple is the best的美態，而Cheryl Fernandez-Versini則既性感又有型。
「好靚，完美演繹simple is the best，一頭金髮襯超deep V大露背晚裝，好簡單嘅cutting但就非常性感，令佢索爆身材表露無遺，好吸睛，身形線條好靚，一行出嚟即成為焦點。前露後露佢都駕馭得到，total look滿分，好出色。」
「性感又有線條美，佢身形比較嬌小，不過着呢條裙顯得佢成個線條好修長，身形比例好，甚至令對腳都偏長。不過對鞋應該簡單啲，換對白、金或者銀色嘅classic尖頭高踭鞋可以balance番個視覺。」
「着重手工嘅雪紡透視one-piece裙，高貴大方得嚟又有少少性感，恰到好處唔會浮誇，好襯佢個甜美靚樣，入面襯咗對今年好hit、長到大腿嘅長boots，好有時尚感，晚裝look都好有型格，髮型好clean。如果佢唔戴嗰條紅色頸鏈會更好睇，條裙本身已經好多details，accessories應該愈少愈好。」
「好靚，條裙簡單得嚟好classic，露背加高衩性感迷人，身形好靚好修長，黑白配好適合晚裝場合，佢嘅古銅膚色同條裙都好match。加番對閃少少嘅耳環或然者手鐲可以增加層次感，令成個look更出眾。」
「好有超模氣勢，女性化得嚟好有型，件披肩令到成個look好stylish同有層次感，好特別，睇得出佢有花心思配襯過，套衫亦都好襯佢嘅短髮，化妝都好match。」
「前面好似平平無奇，但後面就好有睇頭，classic優雅，唯一係對鞋唔襯，條裙已經好多搭帶，對鞋又係搭帶，望落就覺得好亂，換對plain嘅尖頭或露趾高踭鞋會好好多。」
香港著名模特兒陳嘉容（Eunis），曾為各大國際品牌行時裝騷，在時裝界打滾多年，不論時裝的理論還是實戰都難不到她，近年更為電視時裝節目擔任主持，化身stylist教人配襯衣着打扮。