陳庭欣膽粗粗 溶化冰山莊思明
藝人陳庭欣（Toby）和莊思明（Lisa）在《2010香港小姐競選》分別奪得冠軍和季軍，雖然當初在選美頒獎禮上爭妍鬥麗，但轉換環境後慢慢成為親朋密友。即使已經相識5年，一見面依然雞啄唔斷，加上有如親人的感情，令一凹一凸的她們彼此之間毫無秘密，無所不談！
性格相反凹凸配
陳：陳庭欣 莊：莊思明
有人指第一眼的印象就決定以後怎樣看待一個人，但這句話從來沒法發生在Toby和Lisa身上。即使起初兩人相交淡如水，但當參選港姐遠赴印度拍攝外景時獲安排入住同房，她們的友誼就像種子一樣，深深埋藏在土壤之中，五年後的今日已是樹大根深。
陳：第一次見到佢，就覺得佢好cool好難相處。佢試吓唔笑，睇吓個樣即刻幾咁唔和藹可親。佢又生得高，係會畀人一個感覺好似冰山咁，好難先劈得開。
莊：呢個係我畀所有人嘅第一印象嚟，好難keep住係咁笑(o架)嘛。
陳：之後就慢慢發現佢諗嘢原來唔係咁成熟。以為佢有個女強人咁嘅家姐（莊思敏），做妹都應該有咁上下。點知佢好傻，講埋啲嘢都好傻，做啲嘢都好無聊。
莊：而我第一次見佢，就覺得呢個女仔好大膽，會同其他人傾偈。記得佢interview時，大家都係第一次見對方，佢都會主動識朋友，唔會好似我咁，寧願一個人悶死都坐埋一邊。之後慢慢就知佢有少少大姐姐性格，善於照顧人。
陳：其實做朋友，好似我哋咁，一凹一凸反而仲好。如果兩個性格太似，可能會冇咁多趣事。
莊：我自己又咩都講，有咩開心唔開心都會講出嚟。
陳：就算你唔講，我都睇到你咩事，我一問佢就會一輪嘴咁講晒出嚟。
莊：有一次我喺公司canteen，買咗外賣諗住自己食，咁啱佢喺度就叫我坐低食，咁啱同枱有其他人唔方便講嘢，等某個人走咗啦，你就問我：「點呀你，有咩事？」你望我一眼就已經知有嘢。
關係親密如家人
Toby和Lisa的關係似家人，有如「天作之合」，熟絡得幾乎能自出自入對方的家，甚至雙方家人亦因為兩人而變得親密。儘管兩人是同年出世，但Toby望見Lisa「傻妹」性格，自自然然代入大姐姐身份，照顧對方。
陳：其實好似天意咁，同你住嘅地方又好近，所以成日都叫你食個tea，或者上你屋企度坐吓。慢慢就開始自動波，經過上嚟拎啲嘢畀你，其實你唔喺屋企我都照上去。我哋兩邊屋企人又好close，可能我爹哋生日叫親戚朋友食飯，佢都會話叫埋你哋。掉番轉你家姐嘅活動，我都好有興趣同有心去參與。
莊：你都成日拎啲湯上嚟畀我飲。
陳：有啲人仲試過病到死吓死吓，但咁簡單嘅嘢你都打嚟問點算，叫你去睇醫生你又嫌遠又唔鍾意，我惟有offer啲嘢畀你啦，問你想食中藥定西藥。你又話西藥太燥，咁即係要中藥感冒茶啦，咁我就車個感冒茶畀你。
莊：其實我係想氹你嚟送藥畀我咋！
陳：唔止呀，有次你傻到唔記得自己搬咗屋，又唔同我講，但叫我照上你屋企放低啲嘢。我拎到成手都係先發現你原來搬走咗。打去搵你家姐求救，你家姐就話：「個傻妹又唔記得咗同你講。」原來你喺屋企人心目中都係一個傻妹。而且我又知你好多論盡嘢同蝦碌嘢，掉番轉你又知我好多好唔女仔嘅嘢、好粗魯，大家都好知對方嘅性格同諗法。
互相力證冇整容
每個人都會經歷醜小鴨時代，即使奪得選美后冠備受肯定，但總會有人雞蛋裏挑骨頭。就算現在羽翼已豐變成天鵝，亦會有人質疑僭建兼動刀非天然。Toby和Lisa已經習慣接受這種冷嘲熱諷，明白自己沒有可能取悅所有人。
莊：我整咗容呀，你信唔信？其實真係有人問過我係咪整咗容，尤其啱啱拍《愛．回家》，內地觀眾都喺我微博度留言，話搵咗好耐先知原來嗰個角色係我做，點解唔同咗樣？係咪整咗容？我通常都答係，令佢哋唔想再問。
陳：有人讚你靚咗一定會開心，我亦都收過唔係positive嘅comment。只怪自己當初化妝又唔識，而我又試過唔識黐眼睫毛問你。
莊：我記得你以前畫眉唔叻，畫到好似一條蟲咁，啲化妝師見到都會頂你唔順，都會捉你整番好條眉，依家就非常之叻。
陳：練咗足足五年呀！當你每日做同一樣嘅嘢，就自自然然會叻(o架)喇。我真係冇咁女仔，其他女仔可能會睇吓時裝雜誌，或者上網睇人點化妝，但自己就真係冇。
甚少傾感情問題
幾乎每一個女孩子在小時候都會幻想長大後披嫁衣走進教堂，Toby和Lisa亦不例外，但當年歲漸長，種種現實問題浮現眼前時，才慢慢將心中想法埋藏深處。
莊：不過呢個諗法真係過咗喇，細個就會成日諗，個個女仔細個都一定會諗(o架)啦！大個咗我要有一個點樣嘅婚禮、着一套點樣嘅婚紗。但係愈大就愈冇諗，唔再着重呢啲嘢，唔知係唔係太細個就已經恨嫁？
陳：你都好清楚咁知我需要啲咩，所以就算已經識咗五年，但講愛情嘅話題真係唔多過五次。
莊：係完全少到我都唔知你係唔係女仔嚟。我身邊都好多女仔朋友，你知女仔一圍埋都係講吓感情嘢同私人話題(o架)啦。而你真係好冷靜，我淨係試過送咗個你鍾意咗好耐嘅公仔畀你，你感動到喊，係嗰次算係有少少激動。
筆錄：若瑟
攝：吳文聰 場地：莆田
陳庭欣髮型：Match ＠ HAiR
陳庭欣化妝：Phoebe Yung
後記：擺甫士默契十足
Toby和Lisa雖然幕前合作機會不多，但鏡頭前卻甚有默契，毋須攝影師多作提點，已經擺定各種表情和甫士，非常合拍。她們更笑言自己似影結婚相多於專訪硬照，又sweet又搞笑。