Bob升呢主角壓力爆煲

「希望大家振作」

做了多年主持和司儀的Bob一直希望自己能成為舞台上的主角，而非一個輔助角色，為了令自己人生無悔，他今年決定把握機會舉行個人Talk Show，日後再有機會更想進軍紅館！

「其實點解會有呢個Talk Show呢？因為由細到大我都好想擁有屬於自己嘅舞台，因為我做咗咁多年司儀、主持，都係屬於配角，即係個嘉賓或者巨星先係主角。已經30幾年啦，我唔想去到臨死嘅時候，回想好似成世人都冇做過主角，所以就諗幾時有咁嘅機會呢！咁我唔理之後有冇機會再搞，可能今次喺伊館，之後喺Star Hall，日後有機會甚至再大夢想啲去紅館，可能啦，但呢一刻我真係好想喺個騷入面，企喺台上，自己做番一次主角！

Bob投資自己孭飛的Talk Show，坦言緊張到壓力爆燈！	Bob經常向大家分享溫馨家庭照。	Bob認為在伊利沙伯體育館搞Talk Show最適合。

想分享正能量

「其實我由細到大都會睇Talk Show，好似黃子華、林海峰，或者一啲外國明星，佢哋都係我參考對象，參考佢哋開Talk Show嘅內容、節奏、表情同動作。不過我想有番我個人嘅元素，令人覺得阿Bob一出嚟會好有熱情嘅，會powerful一啲嘅，我希望大家都feel到呢樣嘢。我唔想大家笑完就算，我其實係想呢個Show一開始到結尾都會有啲正能量分享，希望大家振作，希望幫大家打氣，睇完後充滿能量咁行出會場！」

林海峰（圖）與黃子華都是Bob的參考對象。

黃子華

「背負很多包袱」

Bob將在年尾舉行首個個人Talk Show，由於是自己公司投資的重要項目，Bob除了要顧幕前的演出外，還要處理幕後工作，例如顧票房、宣傳等，他坦言經歷了30幾年人生中最大的壓力，令他壓力爆煲！

「曾經可能以DJ或組合形式喺某啲活動試過一part仔所謂棟篤笑，今次自己一個人孭飛好緊張，呢個亦都係我公司其中投資嘅一個好重要嘅項目，背負住好多呢啲包袱，比起啲人話會考放榜、入大學好緊張，根本我依家日日面對住都係呢個壓力。我喺台上面演出唔會太緊張，我做一個司儀都會有啲壓力，不過呢一種緊張我係習慣咗，所以唔會覺得好大問題。我依家要度rundown、度稿，又要諗吓嘉賓、顧票房、顧宣傳，全部嘢加埋係我未試過咁辛苦！同埋年底好多工作，又電影、電視節目，又有騷、廣告，種種嘢加埋令我壓力就爆煲！

貴飛全部賣晒

「今次個騷會喺伊利沙伯體育館搞兩場，嗰度可以坐二千幾三千人，兩場加埋就五千幾人，所以我同公司拍檔有諗過會唔會去細啲嘅場，例如文化中心、演藝學院呢類地方，但係經過深思熟慮之後，梗係開一個有規模嘅騷啦，所以伊館係最合適位置。」

「依家好感恩，因為票房到呢一刻，兩場所有貴價飛全部賣晒，剩番平飛。真係會鬆一口氣，因為之前好擔心，一個talk show貴飛會唔會有人睇？因為冇華麗舞台、冇華麗服飾，我又唔係唱歌，係講嘢咋嘛。不過我相信最後去到on show時，應該會全院滿座，我希望係咁！」

「人生總有痛苦」

經常於節目中搞gag帶給觀眾歡笑的Bob，坦言為令大家開心，不介意將大家的快樂建築在他身上，又大爆Talk Show內容，指雖然有踩界的黑色幽默及有味笑話，但只會是「12禁」的程度，大家可以放心欣賞。

「個騷嘅內容又未去到18禁，我諗12、3禁啦。其實太細個又未必會明白哥哥喺台上講咩，咁總會有啲課題牽涉到成長，有啲關於性嘅嘢，會有踩界嘅黑色幽默、有味笑話，當然我唔會好露骨，絕對唔會係三級，唔會爆粗同講好多鹹濕嘢，我都知道自己嘅觀眾群。

請老友做嘉賓

「其實人生過程遇到好多事，有啲係痛苦嘅，但之前我演繹出嚟嘅時候，身邊人聽完反而覺得好好笑，所以就諗到如果我將呢啲嘢集合晒喺舞台同大家share，又會唔會畀到大家開心呢？將大家嘅快樂建築喺我身上，係冇問題！

「至於神秘嘉賓就梗係要保持神秘，我兩場都會請啲過去呢十幾年做嘢認識嘅好朋友，每場可能2至3個人，佢哋會喺個騷佔咗個位置。不過想保密令大家有驚喜。」

【後記】忙裏享天倫

育有三個女兒的Bob因為工作忙碌，經常在社交網分享溫馨家庭照，表達對妻女的思念，他坦言現在這個市道有工作，是值得感恩，而且自己正值搏殺期，一定有取捨和犧牲，就是少了時間見家人和同事，所以做事一定要快手快腳，爭取更多私人時間！