嘉玲5字頭更寬容避嫌唔行山
女星劉嘉玲早前因與關之琳前夫陳泰銘行山而惹女方不滿，昨日嘉玲現身活動時，將踏入50歲的她坦言要更慈悲及更寬容，又指不介意跟陳泰銘再相約行山，但現時屬敏感時期則不適宜。
女星劉嘉玲昨日出席「星閃冬日 歡度BVLGARI 羅馬假期」主持銀蛇亮燈儀式，身穿火紅色低胸晚裝的嘉玲佩戴了品牌逾三千萬、135卡蛇形鑽飾，閃爆全場。嘉玲初時開玩笑指首飾不夠貴，及後才正式道：「我好鍾意佢哋嘅蛇形設計，因為我係屬蛇，所以特別有感覺。」本月8日正是嘉玲的50歲生日，她稱踏入12月十分開心，既是其生日，也是聖誕，問她如何慶祝時？她說：「生日會同屋企人過，舊年49歲搞得好大，已經慶祝咗。」
未有主動聯絡關之琳
她又表示覺得5字頭特別有意義，自己於去年亦已做總結：「我要令自己開心啲、健康啲，更慈悲同更寬容。（因為之前有啲新聞令你唔開心，所以要更慈悲寬容？）唔係，啲報道唔會左右到我，最緊要心安理得，食得落、瞓得着。」之前關之琳暗示不滿前夫陳泰銘與她行山，問嘉玲可有跟關之琳聯絡？她坦言：「冇，等佢平靜啲先。（會主動聯絡佢？）時間可以治愈同解決問題。（趁生日約佢一齊慶祝？）今年唔會大搞。（會唔會再同陳生行山？）如果佢約我都會，但呢個咁敏感時期，都係遲啲先。」
另提到同樣屬蛇的郭富城有新戀情，嘉玲十分戥對方高興：「佢一直都有新愛情，覺得佢搵到嘢畀自己開心係好事。（對佢放拖手相好驚訝？）我唔會覺得驚訝，我覺得好浪漫。（同老公都會咁浪漫？）係都唔介意咁做，但我哋咁多年，唔會突然好浪漫。」
楊愛瑾想同狗拍婚照
同場的楊愛瑾被追問與永安太子爺男友郭永淳的婚期時，她稱仍未定，正計劃中，之前已在外地拍攝了婚紗照，但她希望可以跟小狗再多拍一輯婚照，對於男友前妻伍智恆終送上祝福給他們，Miki表示：「多謝。（結婚會唔會通知佢？）熟朋友都會講。（得到佢嘅祝福係咪你嘅最大安慰？）其他人唔想去comment，希望大家睇到我哋嘅將來最重要。」同場的Jocelyn中門大開，以超性感晚裝與老公恩愛現身。而莊思敏亦有到場，明顯發福的她表示為拍戲而增肥20磅。
文：名人組