古天樂保持低調拒晒恩愛
男神古天樂昨日到銅鑼灣出席《星球大戰》活動，對於另一男神郭富城「破齋」公開戀上內地模方媛，古仔直言不會仿傚：「人哋嘅嘢唔評論喇！我繼續保持我嘅態度，盡量低調。（第日拍拖會公開拖女友手？）唔回應，少說話多做事。（接受細自己廿幾年嘅女仔？）關於感情嘅嘢我從來都唔回應。」
自認是「星戰Super Fans」的古仔表示其玩具倉庫內有一半都是《星戰》Figure，笑言絕不會割愛珍藏：「可能會搞吓展覽，其實大家都開心我收藏到咁多，依家有新一集電影，相信又要買一批新嘅收藏品。（諗住花幾多錢？）大部分係人送，我好開心。」對於其《星戰》廣告被網友配上其經典舞曲《今期流行》，古仔笑言有創意及「好Match」！