Ricky扯火：差佬嚟你玩X完！

戴夢夢於5月底被《好報》拍得在街頭發男友Ricky脾氣，做出四度剝裙的驚人壯舉，至上月尾她才表示發脾氣才做出「能人所不能」的行為，實不應該這樣做。惟講完不夠幾日，最新一期《好報》再拍得她與Ricky在上月23日晚上，又在街頭吵大鑊，Ricky揸車回家期間，身為乘客的夢夢三度打開車門「企圖跳車」，Ricky見女友行為過火，立即爆粗鬧爆她：「你點對我呀？我揸緊車你跳車？你閂唔閂X門呀？我話X畀你聽，如果有差佬嚟，你即刻玩X完！」

「我只係想落車」

夢夢「企跳」事件爆出，即全城熱議，女主角夢夢昨晚在銅鑼灣一活動現身時，面對記者提問全程擺款兼發爛渣，對「企跳」一事回應說：「冇乜嘢啫，唔係大件事，啲相係上個月影到，我哋都唔記得喇！（又嗌交？）情侶少不免有摩擦，小事！」問她是否覺得行為過激？她顯得愈來愈躁：「你哋問埋呢啲問題，我唔答！（點解次次出街都嗌交？）點解你哋成日影我吖？（點解打開車門『企跳』？）唔係，我只係想落車。」

「企跳」1 菲林明道	「企跳」2 天后廟道	「企跳」3 雲景道

問她是否知道犯法？夢夢立即怒睥記者，令現場充滿火藥味，並說：「總之好小事，我哋感情好好。」並示意工作人員推開記者，當記者再次圍埋再追問她跟Ricky何時結婚？夢夢表示不想再講，問是否不滿Ricky未辦妥離婚？她即呼喝記者，沒有理會問題：「畀我行啦！」當有記者表示以後不再問她問題時，夢夢始死死地氣說：「私人嘢唔講喇！」

星街互罵 Ricky與夢夢在街頭大吵，他軟硬兼施才氹掂女友上車。	放大圖片	上車後夢夢（右）突然爆喊與Ricky再鬧過。

男主角話普通嘢

在此之前，夢夢昨日先現身韓國天王Rain的演唱會發布會，當她被問到是否嬲男友因未辦妥離婚而發脾氣？為何「企跳」？是否知道犯法？等問題時，她煞有介事刻意迴避，只說「唔答、唔答」即告離去。至於幾乎被夢夢玩謝的Ricky回覆本報時，竟然覺得夢夢「企跳」是「碎料」：「其實呢啲嘢成日都影到，我覺得好普通，我食緊飯，唔講喇，拜拜！」

Ricky與夢夢開完餐後又嘈過，還出手推推撞撞。	春園街推手	戴夢夢昨晚出現時死口唔認三度企圖跳車。

由街頭鬧到返歸

事緣上月23日晚，「朱夢」現身灣仔星街先來一輪罵戰，二人其後開車往春園街晚膳，食飽儲夠力氣後，他們再嘈過。糾纏數分鐘後，夢夢終肯上車返歸。惟Ricky的保時捷座駕駛至菲林明道和駱克道交界燈位時，在黃轉紅燈期間，身為乘客的夢夢突然打開車門，只見二人在車廂中拉扯並傳出破口大罵聲，到轉綠燈時，雙方仍擾攘起碼兩、三分鐘Ricky才開車直駛大坑方向。

駛至大坑永興街，Ricky的「波子」愈揸愈快又胡亂Cut線，險象環生。夢夢跟住把行動升級，當駛至天后廟道時再次打開車門，令情況更為驚險。數分鐘後駛至家門口對出的雲景道，夢夢二不離三，在行駛期間再玩嘢第三次打開車門「企跳」，Ricky即時急急煞掣停車，最後搞到Ricky破口大罵，夢夢才肯罷休。

文：專案組

攝：追蹤組