阿刨悉心打扮上香悼恩師
有「戲迷情人」之稱的粵劇名伶任劍輝昨日逝世26周年，一班徒弟包括龍劍笙（阿刨）、梅雪詩（阿嗲）、陳寶珠和謝雪心等，先後抵達任姐老拍檔白雪仙的跑馬地住所，向恩師致祭。眾人悉心打扮，阿刨以花衫配蝴蝴結鞋，寶珠則手執潮牌紅色格仔BaoBao袋，而心姐就以一頭紅髮背貓咪包包現身，均令人眼前一亮。
正午12時，不少任劍輝的戲迷陸續登門上香憑弔，而阿刨就在下午1點鐘由司機接送下到達，她說：「同任姐裝番炷香。」逗留約1小時後便離開。阿刨表示仙姐家相當熱鬧，愛徒好友紛紛到來：「嚟完一批又一批，又走一批咁。（有幾多人？）好多，幾十個。」問有否請白雪仙欣賞她年底主演的《紫釵記》全劇？她即謂：「有請呀！（佢有冇話去？）我唔可能講『你係咪去（口架）？』咁（口架）嘛！（依家趕去排練？）係，要返去操曲。（啲飛好難買，已經賣晒喇！）多謝！」又謂現在練習進度良好。
謝雪心冇打牌
而謝雪心和阿嗲就在下午1點半左右分別到達逸廬。謝雪心表示會跪在師傅靈位前斟茶：「梗係要拜師傅啦！（咁多人會唔會打吓麻雀？）今日唔會喇，佢哋啲麻雀腳唔係我嗰啲嘛。哈哈，仙姐聽到會剁我。」而阿嗲就表示準備了鮮花致敬：「好多人都嚟，任姐生前鍾意熱鬧，年年都係咁。」兩人和寶珠逗留至下午3點半就齊齊離開跑馬地。
文：影視組