阿倫多得健仔宣傳食到應

樂隊溫拿昨日現身尖沙嘴為明年農曆新年（2月6至10日）的紅館演唱會《溫拿NEVER SAY GOODBYE演唱會2016》舉行記招，鍾鎮濤（阿B）太太范姜和細女鍾幗亦到場支持。當司儀大讚五子靚仔時，阿倫即指住演唱會海報自嘲過度美圖：「一睇就知係世界大騙案啦！」溫拿近日為預防前列腺癌拍廣告，五子搞笑地重演「雙手遮住下體」動作，阿倫笑謂：「迎接猴年，怕人哋猴子偷桃！」而演唱會主辦單位之一、藝能製作副總裁葉偉忠，亦向五子大派利是送贈演唱會門票，助解被追飛債之苦，令他們笑逐顏開高興過得金牛。

陳友印定告別海報

陳友在台上有感而發，直言之前印了批告別紅館海報，幸經大家研究已更改。阿倫受訪時問到此事，他反問：「吓？講得咩？違反合約精神喎！」陳友即縮沙：「咁當我冇講過啦！」阿倫就解釋海報設計一樣，只是字眼不同，現在是「NEVER SAY GOODBYE」望五子能唱到80歲。

至於演唱會反應熱烈可考慮加場？五子謂因紅館檔期有限，最多只可加開兩至三場，會否於明年年中開Part2？阿倫即暗寸彭健新：「咁快？一筆還一筆。今次宣傳食到應，嗰單嘢（傳解散）多謝健仔，講足一個星期，六日頭版，一日內頁。（之前解散係真？）真係想揼佢！」

阿B被封「前列棍」

至於提到早前拍預防前列腺癌廣告，阿倫笑言：「個個都去得好盡，如果隻手有動作就唔好！」他指住演唱會海報笑阿B激凸：「有動靜！」陳友亦附和：「有陰影！」阿倫笑阿B是有心有力，可做「前列棍」代言人，被笑有雄風的阿B答謂：「用得就得啦，唔使咁威嘅，一講依啲嘢就高興！」有人笑對話內容夠風月，阿B聞言竟笑到噴水！此外，阿B稱全家都會來撐其演唱會場，但阿倫身在外地升學的囝囝沒假，故未能回港睇騷過年。

文：音樂組