祥嫂立平安紙遺產冇仔女份
已故慈善伶王新馬師曾（鄧永祥）遺孀洪金梅（祥嫂），昨日再就與子女鄧兆尊及鄧小艾的爭拗開腔，指有人奢想與稅局打官司，以為可以不用交遺產稅，她又揚言對子女心淡，並已立平安紙處理身家：「捐咗都唔畀佢哋！」更以「一夫到尾，守身如玉」，回應她有男性密友的傳言。
祥嫂1997年起與子女鄧兆尊及鄧小艾等，就新馬師曾遺產爆出爭產事件，至2006年和好如初，到近月又爆不和。上周一祥嫂大爆兆尊及小艾曾登門求見，逼簽文件。
「捐咗都唔畀佢哋」
祥嫂昨在寓所由好友黃夏蕙陪伴下受訪，事前有指她將出示證據，對此她謂：「證據係有，但冇必要攞出嚟，因為咁做會變鬧劇，其實唔使證明，母親一定啱，最唔啱係生啲不孝子！（你話子女畀授權文件你簽，係授權乜嘢？）我名下已經交咗遺產稅，佢哋就應交未交，想同稅局打官司，唔知佢哋諗乜？唔使交呀？我提過啲『紅衞兵』，唔好欠稅局錢。佢哋唔值得我信，我仲簽嘢授權聽命於佢哋嘅律師樓？（小艾話合作，就係打遺產稅官司？）你問番佢，但呢啲人冇表達能力，鬼同佢做生意，包蝕！（兆尊話如果有嚟過搵你，一定撞爛鐵閘？）佢有嚟過，閉路電視一定拍到，叫咗保安公司整理。」
祥嫂坦言對子女心淡：「淡過淡水。（遺產唔留畀子女？）一定唔留畀佢哋，啲『紅衞兵』虐待到我體無完膚，捐咗都唔畀佢哋。我平安紙都做咗，等啲『冚X拎』咁曳！（有人暗指你有男性密友？）我一夫到尾，到今日都係守身如玉！（有人想謀你身家？）冇得謀，一係殺咗我！（四子女中有冇邊個仲有親情？）冇！都係『紅衞兵』託世，只識錢最親！」
爆兆尊有三女友
祥嫂又爆兆尊有三個女友：「佢四個出世至今，未拎過錢返屋企，兆尊養十幾隻貓，自己都養唔掂，仲有三個女朋友，有個喺骨場識。」記者就事件向兆尊查詢，他說不回應。
文：影視組