鍾嘉欣患創傷後遺症：聽到的士開門就喊！
鍾嘉欣、楊思琦、陳浩民及唐文龍等於10年前在番禺拍無綫劇《人生馬戲團》，期間眾人往唱K消遣，離開之際傳被當地賊人打劫，更有傳思琦和嘉欣失蹤數小時，事後無綫高層勒令相關人士封口，多年來引來外間不少揣測。嘉欣在前晚播出的無綫節目《娛樂3兄弟》中首度講述事件，指當晚上的士離開時，眾人被一班持圓月彎刀的人追殺，幸好她與思琦躲了起來，但事後嘉欣也有創傷後遺症：「每次聽到的士開門聲就驚到喊！」
鍾嘉欣於前晚播出的無綫節目《娛樂3兄弟》中任嘉賓，期間嘉欣講到2005年與楊思琦、陳浩民及唐文龍等到番禺拍無綫劇《人生馬戲團》時的一次恐怖經歷，令她產生創傷後遺症。
藏身垃圾堆
嘉欣透露，事發當日是8月7日思琦生日，眾人在唐文龍及陳浩民安排下，到番禺一間卡拉OK為思琦舉行派對慶祝，他們唱K至深夜1時離開之際，在街上竟被「彎刀幫」追殺，嘉欣憶述：「最後剩番10個人走，我最心急，行到最前截的士，一開門（的士門），有十幾二十個男人，拎住大把圓月彎刀跑過嚟，佢哋舉起手講『別走』（普通話）！我覺得係追殺我哋，追到掘頭路，我覺得我哋死梗！」
混亂間嘉欣與思琦在磚及垃圾間的大窿中匿埋，久久未敢離開，最後被助導發現：「之後我係咁爆喊，有創傷後遺症，每次聽到的士開門聲、鏗鏗聲就驚到喊，維持咗年半先平復。（知唔知追殺原因？）我當係點錯相。」
無懼封口令
昨日嘉欣接受電話訪問表示早已走出陰霾：「遇到咁嘅事會有驚呢啲反應好正常，總之依家完全冇嘢喇。（點解會再講呢件事？）唔係我提o架，係佢哋問，我照實答。」對於當年傳聞有「封口令」，問無綫高層樂易玲是否知道嘉欣會再提此事？她說：「事隔咁耐，又唔喺香港發生，都事過境遷，冇所謂啦！」
文：影視組