克勤葡萄Joey向體壇巨星集郵
歌手李克勤昨日舉行新碟簽唱會，他自言近日忙於睇球賽，活動後即到紅館睇羽毛球賽，克勤坦言：「之前祖兒 （Joey）喺內地拍真人騷見到林丹，仲send咗張合照畀我睇，搞到我好葡萄，好彩我都識咗李宗偉冇咁蝕囉！」
講到跟不少運動員如拳擊手曹星如熟落，克勤笑言：「係呀，我面皮厚啫。（藝人着數啲？）唔知（口架），我盡量利用我知名度啦，梗係咁啦！」不過，克勤繼續葡萄祖兒：「佢成日遇到啲運動員，林丹、易建聯、奧雲都有，全部都係我想遇到嘅人嚟。（祖兒集郵成績叻過你？）一定係啦！佢尋日又去埋賽車界啦，咁得意去頒獎嘅！」