Yanny Jessica姊妹情深攬住瞓

Y：Yanny　J：Jessica

組合Super Girls成員Yanny與Jessica算是隊中姊妹最情深的一對，每次出活動都黐到實。雖然兩女人氣及工作量不及三隊友，但勝在天生樂觀及不計較。在互相扶持下，早前終獲內地電影公司睇中拍住上，短短兩星期「同床」生活，兩女笑言增添不少「情趣」，每晚儼如情侶傾到攰才抱頭大睡，Yanny更會攬住Jessica先肯瞓覺。

初相識勁啱傾

眾所周知Super Girls中，有「冰山美人」之稱的Yanny與「公主」Jessica最老友及投契，五女出席活動，兩人不自覺地企埋一齊。能夠成為好姊妹，兩人坦言是緣分的安排，首次見面已互相留下好印象，亦不擔心會惹來三位成員妒忌。

Yanny從沒想過Super Girls有解散的一日，因為大家感情要好。	Yanny很開心可以拍電影，嘗試多方面發展。	Jessica認跳舞唔叻，但會將勤補拙。

Y：一識你覺得你好特別，有少少似姐姐感覺，可能因為我哋大家都有姐姐同妹妹，唔知點解好多時諗嘅嘢好一致，見到啲唔對路嘅嘢望一望大家，就知大家諗啲乜。對你第一印象好好，當年大家各自上依家嘅公司面試，你畀我感覺好斯文、好有笑容、好親切。

J：你當時畀我嘅印象都好好，因為好多女仔喺度，你好斯文，離開公司我唔識行去港鐵站，但你教我，你仲話要趕住返學，我就覺得呢個女仔幾可愛，仲咁注重讀書，覺得你好乖。到咗我哋組成Super Girls，初初你係一個好封閉嘅人。我哋話出去食嘢，你永遠都唔會join，你要用好多時間觀察，先至願意去交朋友嘅人。

Y：我好需要安全感，見到陌生人要坐埋一邊睇清楚佢係乜人先同佢哋相處。其實都要時間，初初大家見面比較陌生唔係好認識，之後大家經歷好多嘢，大家會講出嚟，慢慢就知道每個人嘅個性，咁開始大家感情就好厚，真係會掛住對方。

J：我同你嘅友情相信其他成員唔會妒忌，咁其他成員可能同其他成員啱傾啲，唔同諗法。

Y：我哋絕對相信對方，因為好多時會為對方諗。有一件事發生咗，有啲位好尷尬唔敢同大家講，我會將自己醜嘅一面話你聽，唔覺得你會笑我，有時做錯嘢好難受，但你會不斷安慰同鼓勵我。

J：有時事業上有啲低潮位會同你傾，好難開口嘅嘢都會同你講，你永遠都畀好多正能量我，雖然估到你會講乜，但都好想同你傾。其實大家一直扶持緊對方，因為一路以嚟條路好多崎嶇位。

Y：我最深刻係跳舞，初初對跳舞覺得好痛苦同吃力，又跟唔到。去電視台表演，要兩日搞掂晒隻舞，我就覺得好痛苦，直頭喊晒、腳趾損晒。我知其他女仔都好明白我，但我會不停同你講，覺得你唔會嫌我煩。

J：可能你覺得我有共鳴，我哋跳舞底冇其他成員咁好。有時我哋唔想麻煩其他人，可能佢哋未必明點解覺得咁辛苦。

潔癖鬥那渣

Yanny與Jessica日前終於孖住上接拍內地電影，於戲中飾演表姐妹，默契十足的兩女笑言拍對手戲完全冇難度。由於要留在內地兩星期進行拍攝，同床瞓的兩女終發現「相見好同住難」的問題，有潔癖的Yanny嫌棄Jessica「那渣」。

J：可以同你合作好開心，因為太熟同清楚大家，所以演戲放啲，好有默契同自然，唔使諗要點演繹。

Y：咁啱劇中我係表妹，你喺表姐，所以我哋已經有一個友情喺度，所以出嚟效果好自然。今次當一齊去玩，同埋係一個經歷，喺我人生歷史上幾難忘、一齊經歷過挑戰嘅嘢。

J：當收到有呢個job開心到唔識講，因為同你特別多嘢講。我好易有壓力，當收到個角色就會諗好多嘢，然後會瞓唔着，但知道同你一齊，就算我有咩擔心、煩惱，你隨時喺我身邊，可以隨時同你傾，咁樣可以紓緩我嘅壓力。

Y：最正係你可以幫我分析好多嘢，覺得你好幫到自己。但我哋成日做埋啲傻嘢、誇張嘢都咁夾。

J：點解咁freind？大家都係好無厘頭，大家諗嘅嘢都好怪。

Y：因為我有潔癖，酒店房有張梳化，大家去完食飯，返到酒店就坐喺梳化，你沖完涼着住睡衣又坐上梳化，我就「咦」咗聲，唔係鬧，話囉。

J：你嫌棄我，叫我唔好同你瞓，同隔籬房嘅經理人瞓。同埋你當我係公仔，瞓瞓吓成隻手搭埋嚟放喺我塊面，隻腳又搭上我度。

Y：因為我平時瞓覺有隻bear bear熊，會夾住嚟瞓，所以不自覺當你係隻熊。我瞓覺好誇張，會360度咁轉。

從未想過解散

女團往往都會出現不和、妒忌、爭寵，大部分最終抵受不住是非而解體，甚至作個人發展。出道三年多的Super Girls相處融洽，每次出席活動均有說有笑，不會發生爭企位及爭嘢講，Yanny坦言從未想過組合解散。

Y：我諗大家可能會諗呢一日（解散），我就冇諗到咁遠。覺得暫時呢一刻大家仲想睇我哋五個一齊，一個人可能會有啲乏味，所以我會專心諗目前做好所有嘢，先見到前面嗰一步點做。

J：我係嗰種船到橋頭自然直嘅人，相信我嘅人生去到每個位都會有轉變，會順住去轉，好少諗之後係點。可能會做生意，設計吓唔同嘢，搵吓有咩機會，依家未行到嗰個位，到時再算啦。

後記：無厘頭孖寶

Yanny同Jessica真係「天生一對」無厘頭孖寶。訪問當日，兩女一齊走入房換衫，期間傳出大叫聲同唱歌聲，換足十分鐘都唔肯出房的兩女明顯諗計炮製驚喜畀筆者。當兩女走出房突然企在筆者面前攬埋一舊跳舞，筆者當然把握機會拍低兩人傻樣，抵死的Yanny竟對住鏡頭嬌嗲說：「我好鍾意工作。」認真笑爆肚，短片仍在筆者手，好快就會放上網公開「孖傻」嘅一面。

文：火品木　

攝：劉斌

服裝：Zalora