軒仔認老 衞冕歌神有壓力

歌星張敬軒、許廷鏗與鄭俊弘等昨日出席《2015年度勁歌金曲頒獎典禮》記者會，去年「最受歡迎男歌手」得主張敬軒被問到可有信心冧莊？他說：「隨緣啦！雖然今年成績幾好，但許廷鏗、鄭俊弘同胡鴻鈞都好有實力，有一定壓力。」軒仔又自嘲「老藕」：「我係傳統唱片公司歌手，有偶像包袱，但都係『老藕』，參加頒獎禮都有啲唔好意思。」而許廷鏗今年雖然有七、八首歌出街，但冇諗過爭男歌手獎，與軒仔傳緋聞的他又刻意保持距離。另外，席上率先頒發「最佳廣告歌曲金獎」，由組合Super Girls的歌曲《一拍即愛》贏出。