蕭正楠飛沖繩 波鞋解相思
蕭正楠（Edwin）、陳凱琳、陳展鵬及田蕊妮等，昨日出發到沖繩拍攝無綫新劇。Edwin再以女友黃翠如贈送的波鞋風騷示人，自爆受相思之苦的他笑言靠着鞋去睹物思人：「呢排都會着住，好窩心，佢仲送白松露nuts，自己唔食都買畀我食！」
蕭正楠（Edwin)、陳凱琳（Grace）、陳展鵬、田蕊妮（阿田）及譚偉權等，昨日於機場啟程到沖繩拍攝無綫劇集《巨輪II》外景。Edwin再以女友黃翠如贈送的波鞋亮相，他冧爆笑稱要「日日着」去睹物思人：「呢排都會着住。（瞓覺都着？）咁會腳臭！」Edwin透露翠如除了送鞋，更送上昂貴的白松露nuts：「好窩心，佢自己唔食都買畀我食。（娶得過？）咁我都唔會虐待佢，有咩好食我都會學煮畀佢食。」他乘機大呻與翠如較少時間見面：「佢返嚟我就飛，（靠視像聯絡？）我同佢講電話講一、兩分鐘都聽到鼻鼾聲。」
鴛鴦戲水不需備案
談到特別場口，Edwin表示與Grace將拍攝裸泳戲，但直言母須向女友備案：「我哋唔係真係裸，電視尺度有限！」同場Grace對此開玩笑稱要搵替身上陣：「周圍召集替身都冇人肯做，會露背。不過其實講吓笑，我角色好放，想做就做。（問准男友鄭嘉穎先拍？）唔使，拍戲啫！」她表示會於當地逗留兩星期，更透露男友無暇探自己班：「佢喺香港有嘢做，今次過唔到嚟。（你叫過佢嚟？）好隨意，冇嘢做咪嚟。」
阿田有信心封視后
至於陳展鵬透露於劇中與鍾嘉欣又咀又錫上演浪漫戲份。談到他獲洪永城力撐封視帝，展鵬說：「佢ok呀，到時佢攞獎梗係開心！」而日前喜獲台慶大利是的阿田笑言於當地請食開工飯，笑言有信心稍後獲封視后。文：影視組