黃愷怡被童化 向舞台劇進發
《Think Big天地》主持人之一黃愷怡（Jasmin），畢業後誤打誤撞當了兒童節目主持，一直對小朋友沒太大好感的她，其後成功被小粉絲「收服」，愈做愈有heart！對話劇、舞台劇甚有興趣的她，更揚言出演舞台劇為其入行的「終極目標」！
自告別《智叻小人類》、《放學ICU》等無綫經典兒童節目後，《Think Big天地》成為新一代兒童節目，當中除形式、環節、遊戲有所改變外，主持方面亦引入不少年輕新面孔。當中主持之一黃愷怡更憑甜美笑容跟自然的主持技巧而成功彈出，成為節目一大亮點。
小粉絲成動力
對幕前工作甚有興趣的Jasmin外表甜美可愛，非常切合兒童節目，惟她起初並無預計會成為兒童節目主持：「嗰時仲未畢業，見到有個節目招募新人，未知係幕前定幕後，反正覺得幾得意諗住試吓。過咗兩個月叫我去interview，本身話旅遊節目嚟，之後就變咗兒童節目，我當刻都好意外亦猶豫咗一陣，因為我本身唔係好鍾意小朋友，亦覺得自己偏向成熟啲，所以驚唔適應，不過後嚟做落先發現原來好有意思。」
成功被小朋友「融化」的Jasmin愈做愈有heart，並笑言自己像「小老師」一樣，全靠一群小粉絲給予無限滿足感和動力：「做兒童節目好似做小老師咁，一樣可以改變佢哋好多，真係冇諗過原來有好多小朋友都鍾意睇呢個節目，又真係會返屋企試啲小實驗，再返嚟同我分享，真係畀到好多滿足感我，更有動力做好每一個環節！」
上戲劇班增值
問到日後發展方向？Jasmin坦言甚麼都想試，更視舞台劇為入行的終極目標：「我諗拍戲係我嘅終極目標，但我就偏向鍾意舞台劇多啲，因為我覺得舞台劇嘅準備工夫多好多，好多肢體語言、角色性格都要花好多時間去揣摩，唔係拍戲咁可以分場口拍，可以剪接，而係一次過演到尾，仲要係『直播』！所以我依家都有上啲戲劇班增值，等機會嚟嘅時候唔會手騰腳震！」
文：Cinyi
攝：劉智源
場地：Decor Collection帝家設計