家強收火添女味 蘇永康軍臨紅館
由蘇永康、黃家強、梁漢文及任賢齊組成的「男人幫」首度合體登陸紅館，先有家強放下搖滾風格，挑戰獻唱女人歌，再有梁漢文預告在舞台騷肌，不過潮人蘇永康就主張晒衫唔晒肌，計劃到時四人齊以軍服Look華麗登場！
男人幫將於本月27至29日假紅館舉行一連三場的《男人幫演唱會2015》，四個男人聚首一堂，務求擦出最爆火花，其中Beyond出身的黃家強率先預告會拋低搖滾風格，首次挑戰唱女仔歌，他謂：「會唱經典女仔歌，好緊張，因為好少唱人哋嘅歌，女仔歌仲係首次，都同音樂老師研究過，點喺男人身上發揮到最好。」
梁漢文恨晒肌
一直有操肌的梁漢文覺得登上紅館除了展示歌藝，亦應該要晒肌冧粉絲，家強笑說肌肉要留到出寫真時才「開光」。減肥路上仍需努力的蘇永康直言喜歡騷衫多過騷肌：「我都唔知依家瘦咗幾多，總之有啲成就，肌肉呢每次開騷我都齊晒，但我唔拎出嚟，只係對自己負責任。」
蘇永康亦有為歌衫出力，並透露屆時四人會華麗登台：「今次係以軍服為主軸，到時着上舞台嘅，會比MV嗰件軍服靚好多，因為上到台點都唔可以單調。」
做巡唱怕厚衫
不過，蘇永康又笑言穿厚衫做巡唱，怕難耐東南亞的炎熱天氣：「諗緊做巡迴點算，成張氈咁褸上去，去熱嘅地方就慘喇，30幾度戶外點算？老闆（任賢齊）你真係要幫我哋諗諗佢。」
文：音樂組
攝：林蔚恩