單立文鬼上身 嚇親豹嫂
唱得又演得的單立文在舞台劇《羅生門》中一人分飾四角，其中最具挑戰性的一場戲，他要在台上「鬼上身」喊冤控訴。當他在家裏排戲練習時，因為太逼真兼肢體動作大，搞到「豹嫂」胡蓓蔚嚇餐飽。
單立文、麥長青與江美儀在黑澤明電影改編的舞台劇《羅生門》中，鬥演技兼鬥講大話，單立文一人分飾武士、小偷、衙差及巫師四個角色，其中最考演技的一場戲，就是即場「鬼上身」伸冤：「嗰場戲講個鬼魂出嚟控訴，講番晒成件事出嚟，呢一場戲係最震撼，開頭我係巫師身份出嚟，跟住即刻上身變武士鬼魂，講番自己點死。」
問到平日可會與老婆大人胡蓓蔚在家排練？單立文笑指在排練時，因動作太誇張而嚇窒太太：「講呢啲！同佢冇呢啲情趣，呢啲嚴肅嘢佢有時唔知我做乜。因為我接咗舞台劇後，成日會發咗神經喺屋企做啲動作，舞台肢體動作要誇張啲嘛，有時我喺屋企練習嗰陣，佢就話『做咩呀？你冇嘢唔妥吖嘛』，嚇親佢咁。」
冇份參與音樂製作
單立文今次在舞台劇亦獻出了「第一次」，與麥包以劍道「互劈」，他說：「要打劍道，有兩場要同麥包真係對打，我冇功夫底子，打乞嚏、打喊露就識，所以要特登跟武術指導學。」他又提到今次舞台劇班底強勁，加上有歌舞配合劇情，樂隊出身的他謙虛表示今次未夠「Quali」參與音樂製作：「今次我就冇份啦，因為其他人都博士級，我冇Degree唔敢掂啦，今次現場有樂手配合我嘅動作，好新鮮同好享受。」
《羅生門》演出詳情
導演：袁立勳
主演：麥長青、江美儀、單立文
公演日期：2016年1月29-31日（共五場）
公演地點：北角新光戲院大劇場
文：音樂組