江美儀極速變身過3關
好戲之人江美儀將會跳出公仔箱殺入劇場，挑戰舞台劇《羅生門》，一人分飾三角的美儀除了要在舞台極速換衫外，最考起她的是尼姑角色對白禪味十足，需要花大量「腦」力背熟台詞。
江美儀將與麥長青（麥包）及單立文聯手參演根據黑澤明電影改編的舞台劇《羅生門》，在明年1月29-31日假新光戲院大劇場公演五場。美儀在劇中將要一人分飾母親、妻子及尼姑三個角色，實行「精神分裂」挑戰演技：「喺一套劇過三個角色嘅戲癮，可以挑戰自己，睇吓係咪要精神分裂先做到呢？因為三個角色對比好大，依家既擔心又興奮，好想去試，又擔心自己做唔嚟。」
靠綵排記對白
除了演技受到考驗外，美儀還要在舞台上瞬間變身，挑戰最快換裝速度：「難度在於三個角色轉衫嘅時間要好快，有場戲五分鐘內要轉兩個人，不停咁轉，到正式綵排要學吓有咩技巧可以做到。」
其中美儀飾演的尼姑對白艱澀難明，在背台詞時要鬥智鬥力：「覺得自己啲對白最難，因為對白好禪，唔可以好口語化咁講出嚟，慢慢背啦，唔想逼自己，因為我慣咗喺排練時去記台詞，容易入腦，目標兩至三次綵排就可以記晒啲對白。」
被麥長青強姦
提到其中一幕劇情講到被麥包強姦，美儀稱這場戲是講述人性的恐怖，而非賣弄色情：「老實講舞台劇可以去到咩尺度，其實想講一件事發生，可以有咁多個版本，每個人都會喺佢嘅立場有唔同版本講出嚟，呢啲事每日比比皆是，惟有靠自己去分析。」
《羅生門》公演詳情
導演：袁立勳
主演：麥長青、江美儀、單立文
公演日期：2016年1月29-31日（共五場）
公演地點：北角新光戲院大劇場
文：音樂組